Vawiin khan Dr. R.K. Lallianthanga, Chief Scientific Officer hovin Directorate of Science & Technology Office-ah ‘Innovation Festival’ , February ni 6-7, 2016 chhunga Regional Science Centre, Guwahati-a telte pualin inkhawm buatsaih a ni a.

Inkhawm kaihruaitu Chief Scientific Officer, Dr. R.K. Lallianthanga chuan Mizote irawm chhuak ngei thiam thilte tihhmasawnna kawngah tihtur hmabak tam tak a awm tih sawiin Science & Technology chuan theihtawp a chhuah mek thu leh a bikin Innovation lamah pawh nasa taka hma sawn theih a beisei thu a sawi a. Innovation Festival-a Mizoram aiawha zuk kalte thil zuk entirte chu chhuanawm a tih thu a sawi bawk.

Patent Information Centre-a Scientific Officer Pu Samuel Lalmalsawma chuan report tlangpui pein, Mizoram atanga kalte thil entir chu miten an hlut hle thu a sawi a, lawmman atana an dawn shield chu Chief Scientific Officer hnenah a hlan nghal. He festival-ah hian hmarchhak atangin Mizoram bakah Assam, Manipur leh Meghalaya atangin thil thar siamchhuaktu, Innovator-te an tel a. Mizoram aiawha kalte hi Pu Lalbiakzuala Ralte, Pu Lalpiangliana Sailo, Pu Ramdinthara Renthlei leh Pu Lalhmangaihzuala Chhakchhuakt te an ni a. An thil zuk pholante hi Transformer CPS-te, Areca-Nut polishing machine (kuva khehna) leh Agarbati stick making machine-te a ni a, entu mipuite lawm an hlawh hle a ni.

Innovation Festival-a tel Pu Lalbiakzuala leh Pu Ramdinthara Renthlei te pawhin an kal dan report an pe a. Science & Technology Department in ah thil siamchhuahte hlut sak a hetiang hun remchang a buatsaih sak avangin lawmthu an sawi a. An thil siamchhuah entirte hi Mizoram mai ni lo, India ram pawhin a hman tangkai theih turte an nih avangin a tam zawk siamchhuak thei tura sawrkar puihna an mamawh tur thu an sawi tel bawk.

Innovation Festival-a kalte puala inkhawmah hian Innovator –te leh Science & Technology Department officer-te an tel a ni.