Vawiin khan Health Minister Pu Lal Thanzara chuan Sihphir Venghlun-ah Sihphir YMA in Multiporpose Centre an sak tur chu lungphum a phum a, YMA Hall Sihphir Venghlun-ah Non-Communicable Disease (NCD) Clinic a hawng nghal bawk. . Deputy Speaker Pu R. Lalrinawma leh Doctor leh Health department lam hotute bakah YMA leh Khawtlang mipui te nen he hun hi hman a ni.
Khaw taima tak Sihphir khua chu an bawng leh ran dang vulh bakah Iskut leh thlai dangte nen a khawpui chhung chawmtu pawimawh tak an nihnaah fakin Khuallian Pu Lal Thanzara chuan taima tan lo chuan heng hi tih theih a nilo tiin tan la zel tur leh Lungphum tak Multipurpose Centre chu khawtlang tan leh a mi chengte tan chhenfakawm anih ngei a beisei thu a sawi a. Ran vulh ,huan thlai lamah leh NLUP hman tangkai lamahte nasa zawka tan la tura fuihin a hralhna lamah emaw thil dangah emaw harsatna an neih chuan sorkarin tih theih a neih chinah chuan puih zel an in huam a. Tuna huan thlai neituten an kawng hman rim ber Nausel kawng siam tha tur in NLUP atangin emaw a remchang dang atangin emaw nuaih 20 vel in puih an nih tur thu leh, a zawng a za in tunah tih theih nilo mahse hmalak pui zel dan tur ngaihtuah a tum thu a sawi bawk.
Tlawmngai pawl YMA,MHIP,MUP leh a dangte kan nei hi kan ram tan thil tha tak a niin lawmawm a tih thu Pu Lal Thanzara chuan sawiin, YMA te phei chu kan Missionary hmasa te bul tan a ni a, a zahawmin Mizoram tan an thawk tha em em a , tunah ngei pawh Sihphir tana tangkai tak tur YMA in Multipurpose Centre din a bul tan a ni chu lawmawm a tih thu a sawi a. Health Minister chuan Mizoram ruihhlo hluar lutuk in kan ram a tih chhiat zual zel loh nan CYMA hruaituten tlaivar thakin ruihhlo ti thin leh a zuartute man hna an thawk thin hian khawtlang nun a ti thlamuang ani ati.
Kan nunna hi Pathian kutah a awm rualin keimahni kutah pawh engemaw chen a awm thin a, kan taksa mamawh loh zawng kan ei nasat chuan kan dam rei loh phah theih thu sawiin Health Minister chuan vawiinah Sihphir mipuite tana Health Clinic hawn a ni chu ngaipawimawha Doctor ten tih tur leh tih loh tur an sawi te zawma, tha taka in enkawla khaw hrisel tak lo ni zel turin duhsakna a hlan.
Khualzahawm Deputy Speaker Pu R. Lalrinawma Bialtu MLA ni bawk pawhin thu sawiin Health Minister Pu Lal Thanzara’n Model Village atana Sihphir a thlan vangin lawmthu a sawi a. Khawtlang tan mamawh leh tih tur tam tak a awm a, sorkar hmalakna kal mekah hengte hi tih puitlin chhoh zel a beisei thu a sawi bawk.
Dr. Eric Zomawia, NPCDCS Nodal Officer, chuan I hriselna chu I kutah a in nghat e tih thupui hmangin nitina kan nunphunga kan tih tur leh tih loh turte, kan ei leh ei loh turte, kan taksa tana hrisel leh hrisel lo te a lem nena entirin kalkhawmte hnenah hriselna chungchang a sawifiah .
Vawiin programme kaihruaitu Pu Albert K.C. Lalvulliana President Branch YMA chuan Multipurpose Centre an sak dan leh tun hma lama an lo buaipui tawh dan te sawiin khawtlang tangrualin sak chhunzawm zel an tum a ni tiin kan thlansa ngeia sak kan tum tur a ni a, in tinah rawra ilo te pawh kan rawn dil dawn che u a kan thlan tui far hian sorkar a cho chhuak tur a ni a ti a. Pu H. Zorempuia Asst. Secretary Branch YMA chuan Multipurpose Centre sak tur chungchang report pe in Multipurpose Centre sak tur hi ruahhman lawk dan chuan cheng nuaih 80 seng a sak zawh tum a ni a ti. Pu Lalthantluanga VCP, Sihphir Venghlun in kalkhawm te hnenah lawmthu sawina hun a hmang bawk.
