Vawiin khan DRDA Conference Hall, Mamit-ah District Level Vigilance & Monitoring Committee chu Pu C.L Ruala M.P Lok Sabha Chairman kaihhruaina-in meeting neih a ni a. Pu Lalhmingliana MP Rajya Sabha Co- chairman pawh he hunah hian a a tel bawk.

Pu C.L Ruala, MP Lok Sabha, Chairman chuan a hun taka meeting kan neih theih avang leh he hun ngai pawimawha member lo kalte chungah lawmthu a sawi a. Central Scheme, mipuite tana buatsaih thlirletna kan neih hian hmasawnna kan hmu zel a, hei hian mipuite-ah a tha zawngin nghawng a neih zel avangin a lawmawm tak zet a ni a ti.

He meeting-ah hian Pu Lalhmingliana, MP Rajya Sabha, Co- chairman pawhin thusawiin IWDP thlak nan IWMP kan neih hi a bul atanga tha taka kan kalpui a tul a ni tiin PIA te pawhin theihtawp in chhuah a tul ang a ti bawk.

He Central Scheme hrang hranga hmasawnna thlirletna hunah hian Pu C. Lalpeksanga Project Director DRDA, Mamit chuan MGNREGS ah kum 2012-2013 chhungin 2002.14lakhs hmu tawhin Joh card nei 19069 te hnenah ni 42 inhlawhna siam anih tawh thu a tarlang a, tun thla chhung hian ni 14 inhlawhna siam leh tum a nih thu a sawi bawk. Project Director chuan IAY ah hian 2012-2013 chhungin in 150 target chu sak zawh tawh a ni a ti.

He Meeting ah hian Central Scheme hrang hrang, MGNREGS, IAY, IWMP, PMGSY,TSC/ARWSP, NSAP leh RSP/TSC hmanga hmalakna te uluk taka thlirho niin a tlangpuiin a tha thawkhat niin committee chuan a hria a, nasa zawk leh uluk zawka hmalak chhoh zel ni se committee chuan a ti bawk.

Hetih rual hian MGNREGS bikah Mamit District-ah Job Card 18517 awm tur anih lain tun dinhmunah hian Job Card 19069 a awm mek thu tarlan a ni a, hei hi siam dik anih theih nan sawrkar hna thawk chhungkua-ah in hnukdawk tura ngenna siam ni se tiin committee chuan a rel a ni.

Hei bakah hian Zawlnuam a Police Out Post tih changtluna upgrade tura sawrkar hotute hnenah ngen ni se tih te sawilan a ni bawk.

He meeting-ah hian Pu V. Lalremthanga D.C Mamit bakah District chhunga committee members te leh PIA te an tel tha hle a ni.