Vawiin khan DRDA Conference Hall, New Secretariat Complex-ah Aizawl District huamchhung viltu District Level Vigilance and Monitoring Committee chu an Chairman Lok Sabha MP Pu CL Ruala hovin an thukhawm.

Meeting-ah hian Aizawl District huam chhunga sorkar laipui Rural Development Scheme hrang hrang Mahatma Gandhi National Rural Employment Guarantee Scheme (MGNREGS), Indira Awaas Yojana (IAY), Swarnjayanti Gram Swarozgar Yojana (SGSY), Integrated Watershed Development Programme (IWDP), Rajiv Gandhi Gram Vidyatikaran Yojana (RGGVY), Pradhan Mantri Gram Sadak Yojana (PMGSY), Accelerated Rural Water Supply Programme (ARWSP), National Rural Health Mission (NRHM), National Social Assistance Programme (NSAP) leh Total Sanitation Campaign (TSC) hnuaia hna thawh kalpui dan thlirho a ni a. Scheme kalpuitu Department hrang hrang aiawh ten an hmalak dan report pein chak leh zual a hnathawh dan tur ngaihtuahho a ni.

MGNREGS, ni za inhlawhna hnuaiah hian Aizawl DRDA chuan ni 64 inhlawhfakna a pe tawh a, ni 12 inhlawhfakna hi tunkarah sanction leh tur a ni bawk. Ministry of Rural Development-in heng department hrang hrang DRDA, PWD, PHE leh Social Welfare Department kaltlanga thingtlang mite chawikanna tur sum hmuh leh a hman dan te chu chipchiar taka thlirlet niin meeting chuan hnathawh te hi tha thawkhat niin a ngai a ni.

Meeting-ah hian Parliamentary Secretary Pu KS Thanga, Law Commission Chairman Pu R Lalrinawma, Mizoram KVI Board Chairman Pu K Lianzuala bakah sorkar RD, PHE, PWD, Social Welfare department aiawh te leh tlawmngaipawl aiawh te an tel a ni.