Vawiin khan Health Directorate Conference Hall, Dinthar-ah District hrang hranga Chief Medical Officer leh thawktu pawimawh kalkhawm ten 3rd Quarter Review Meeting on Health Programmes an nei a. Parliamentary Secretary Pu S Laldingliana chu khuallian niin Director of Health Services Dr Ramfangzauva chuan a kaihruai a ni.

Pu S Laldingliana chuan State Referral Hospital thuamthat chhoh mek anih thute, Medical College dinna kawnga hmalak dante leh Cancer Hospital pawh khum 100 awm theihna tura hmalak mek anih thu a sawi a. Thiltha nei tur chuan harsatna tam tak sut a ngaih thu leh hemi kawngah hian thawktute pawhin chhel taka tawrh a ngaih thu te sawiin Health Department a thawktute chu mihring nunna enkawltute an nih anga inthlahdahlo turin a chah a ni.

Health Director Dr Ramfangzauva chuan an Department hmun hma te, hmanrua leh building-te humhalh thiam a tulzia a sawi a. NRHM hmalakna tarlangin Infant Mortality Rate tihhniam a, nu in hrisel taka nau a neih theihna tur leh naute tha tak leh hrisel zawka an thanlen theihna tura Sub-Centre pek belh te, thuamthat tura Health Worker lakbelh leh Doctor lakbelh te, CHC thuamthatte leh Ambulance 60 lei belh a nih thu te a tarlang a ni.

Review meeting hi February ni 7 thleng neih a ni ang.