2391/2022-2023
Aizawl the 21st October, 2022 : Nimin khan ‘District Level Workshop on Safe and Secure Transport Facilities for Children by Schools’ tih chu Pachhunga University College, Seminar Hall-ah hman a ni. He workshop programme hi National Commission for Protection of Child Rights buatsaih niin mi thiamten paper an present a ni.

School Education Secretary Pu Lalzirmawia Chhangte, IAS, chuan naupangte himna kawng hetianga hmalakna buatsaih a nih chu lawmawm a tih thu a sawi a, India ram hmun hrang hrangah naupang tihduhdahna leh innghaisakna hi a nasa em em mai a, Mizoram-ah ngei pawh naupangten an tuar ve mek tawh a, sawichhuah emaw hailan loh hi kan state chhungah ngei pawh a awm teuh ang tih hi a hriat a ni a ti a, puitlingte hian mit kan len lehzual a ngai a ni a ti bawk. Pu Zirmawia Chhangte chuan naupangte dikna leh chanvo inrahbehsakna leh tihchhiat sakna a thleng nasa em em mai tate hi naupang himna leh venhimna kawngah hian kan thanharh a ngai tawh takzet a, puitlingte chu naupang enkawltute an ni a, nu leh pa leh zirtirtuten an tu leh fate leh kan thenawm khawvenga naupangte hi a tuartu an ni thei a ni tih hriain, an chetzia leh an nungchangah te diklo a awm a nih chuan a hmu hmasa ber turte an ni tih hriaiin hetiang lamah hian zirtirtute pawh an harh a hun tawh a ni a ti bawk.

Dr. C. Lalsangzuala, Chairman, SCPCR Mizoram pawhin thu sawiin naupangte himna, an dikna leh chavo humhalh hi ngai thutakin ngaih pawimawh a hun tawh hle a ni a ti a. Naupangte hian hmasawn theihna turin dikna chanvo an nei a ni tih te, puitling zawkten naupangte venhim hi an dikna chanvo a ni tih te, dam khawchhuak tur hian dikna an nei tih leh thuthlukna siamna kawngah tel ve theihna dikna chanvo an nei tihte an hriat thar a tul takzet a ni a ti.

He workshop ah hian  Joint Director Pu C. Lalbiakthanga, Addl. Superintendent of Police, Traffic Pu C. Vanlalvena leh Pi Julie Remsangpuii, Mizoram SCPCR ten thusawina hun an hmang bawk. School naupangte himna kawnga hma la tha school hotute atangin thusawi an awm bawk a, zawhna leh chhanna hunte hman a ni bawk a ni.