No.366/2021-2022

Dated Champhai, the 2nd May, 2021: Mizoram chhunga Covid-19 kai thar chak taka an pun avang leh Covid-19 dona kawnga thawktu ten chak leh mumal zawka hma an lak theihna tura mipui pun khawm leh chet vel chungchangah inkhuahkhirhna, Mizoram Sawrkar Order No. B.13021/101/2020-DMR/Vol-IV dated 1st May, 2021 chu Champhai District-ah May ni 3, 2021 zing dar 4:00 atanga May ni 11, 2021 zing dar 4:00 thleng kenkawh ve nghal tur a ni.

He thupekin a sawi bakah Champhai District huam chhunga inkhuahkhirhna kalpui dan tur chu hetiangin siam belh/tih chian hret a nih thu hriattirna chu vawiin khan District Magistrate Pi Maria C.T Zuali chuan vawiin khan a chhuah.

A. Bungraw chàwkluh leh thiar chungchang :
1. District pawn/state pawn atanga bungraw la lut/tithleng turte chuan anmahni veng VLTF hnenah a lo thlen hma ni-in an lo hriattir lawk vek tur a ni a, bungraw thlen hun tura an beisei pawh an hrilh tel nghal tur a ni. Bungraw unload tur Mutia te veivahna tur permit a ngai a nih chuan an lo buaipui lawk tur a ni.
2. Bungraw phur lut tur lirtheite chuan zan dar 8:00 pelh hma-in Khankawn Police Checkgate an pel hman tur a ni a, zan dar 8:00-a Khankawn Checkgate thleng hman lote chuan khaw daia an nghah a ngai ang. Zan dar 8:00 a Khankawn Checkgate pel hmante chu zan dar 11:00 thleng an bungrua thiar/hlan thlak phalsak an ni ang. Bungrua an hlan thlak zawh veleh an haw leh nghal tur a ni.
3. Lirthei khalhtute hian Khankawn Police Checkgate-ah driving license / document an thehlut tur a ni a, an haw pahin an lam leh ang.
4. District pawn/state pawn atanga bungraw phur lut lirtheite chu bungraw hlanthlak zawh veleh an let/haw leh nghal tur a ni a, phurh let tur zawngin khawiah mah an tawi khawmuang tur a ni lo a, khawtual mite nen an inchiahpiah tur a ni lo.
5. Workshop-a lirthei en fel ngai a awm a nih chuan VLTF hnenah an inhriattir hmasa tur a ni.

B. Zin veivah leh mipui chet vel chungchang :
1. Tul bik thil - chhiat tawhna, damlohna leh eizawnna thil pawimawh bik a nih ngawt loh chuan zin veivah/teihawi rih loh tur a ni.
2. District Magistrate/SP/VLTF te phalna tel lovin lirthei veivah khap tlat a ni. Hei hian taxi leh autorickshaw pawh a huam vek ang a, sawrkar hnathawk duty-a chhuakte erawh a huam lo ang.
3. Champhai district chhung khaw hrang hrang atanga bazar tur leh pawimawh dang avanga Champhai kal turte bakah, khaw hran atanga Champhai lut tur reng rengte chuan an awmna VLTF te hriatpuina/phalna lehkha an nei ngei ngei tur a ni.
4. District pawn/khaw hran atanga zan riaka Champhaia cham turte chu an thlenna VLTF-ah an inhriattir (report) nghal zel tur a ni.
5. Loh theih lohna avanga pawn chhuah ngai/zin chhuak tur (chhiatna thil, damdawi lei, inentir, ni tin mamawh lei, adt.) te chuan VLTF phalna an la hmasa tur a ni.
6. VLTF-te phalna (permit)-ah chuan VLTF seal a chuang ngei tur a ni a, VLTF-in seal hranpa an nei lo a nih erawh chuan VC/YMA seal an hmang thei ang.
7. VLTF phalna hi a diltu ten an duh anga an ziah chawp theiha siam/pek chhuah loh tur a ni. Phalna lehkhaah chuan phalna pek chhan te, phalna pek hming te leh phalna pek hun chhung chiang taka ziah lan tur a ni. Hetiang ziak chiang lo reng reng chu phalnaa pawm a ni lo ang. Phalna pek chhuah chu tum khat (1) atan zel a ni bawk ang.
8. Chhungkua/mimal eizawnna kaihhnawih ni lo a huhova lui kal, ramhnuaia picnic, intihhlim, hiking leh adventure sports-te khap a ni.

C. Bazar leh chawhmeh zawrhna chungchang :
1. Nitin mamawh leh eichawp, thlai leh thei, sa leh sangha dawr, thlai chi leh agriculture kaihhnawih zawrhna dawrte chu Thawhtanni, Nilaini leh Zirtawpni ah chauh hawn theih an ni ang. Damdawi dawr erawh chu nitin hawn phal a ni a, a bak dawr dang zawng zawng chu khar vek tur a ni.
2. VLTF-ten chawhmeh/thlai zawrhna an siam chu hmun zawl zau leh thengthaw tha (school kawt/hall kawt, adt) laiah a ni tur a ni.
3. Dawr nghaktu ten an mahni dawrtute inhnaih taka an awm lohna turin indaidanna (rin bial/hrui thlun, adt.) an siam ngei ngei tur a ni.
4. Dawr nghaktu leh a dawrtu zawng zawng ten hmai an tuam ngei ngei tur a ni.
5. Dawr-a thil lei turte chuan VLTF phalna/rem tihna an la hmasa tur a ni, phalnaah chuan hun bithliah mumal taka tarlan tur a ni.
6. Hotel/restaurant/thingpui dawr te chu khar vek tur a ni a; amaherawhchu, DM/VLTF atanga phalna an hmu a nih chuan sem kual (delivery) phalsak theih an ni thung ang.
7. Phalna neia dawr hawnte chu tlai dar 5:00-ah khar vek tur a ni.

D. Sorkar Office :
1. Sawrkar hnathawk leh sawrkar sum atanga hlawh late chu hmun hrang hrangah Covid-19 Duty-in sem darh an ni ang a, an ni hian mipui veivak leh Covid SOP zawm lote an thlithlaiin an vil ang a, a tul dan ang zelin hma an la ang.
2. Head of Office ten anmahni office staff atangin Pisa kai turte a hranpain an ruat tur a ni a, an ruatna detailment order an siam vek tur a ni.
3.Pisa kai turte chuan awlsam taka hmuh theihin ID an awrh/tar vek tur a ni a, an lirthei hmanah pawh an thawhna department hming an bel ngei tur a ni.
4. Pisa kai tura ruatte chuan Executive Duty-te enfiah theih turin detailment order an keng tel zel tur a ni.

E. Quarantine chungchang :
1. Phai lam atang rawn haw RAgT negative-te chu fimkhur takin self-monitoring (mahni hriselna inchik) in midang nena in-contact lovin ni 10 chhung mahni inah (Home Quarantine) an inkhung hrang ang. Ni 10 hnuah RT-PCR/TrueNat test an nei ang a, negative result an neih chuan inkhung zui a ngai tawh lovang.
2. Home quarantine-a awm turte chuan inkhung hranna tur riahna (bedroom) leh inthiarna (attached toilet) hran an nei tur a ni. Chutiang ruahmanna neite chu an chhungkaw member-te inkhung hran ve kher a ngai lo vang. Amaherawhchu, midangin an tawmpui loh tur riahna leh inthiarna hranpa nei lo Home quarantine phalsak an nih erawh chuan an chhungkaw member-te pawh pawn chhuak lo leh midang nen inkalpawh lovin ni 10 chhung an awm tur a ni, an in bang ualau leh remchang laiah fiah takin ‘HOME QUARANTINE’ tih an tar ngei tur a ni bawk.
3. Home quarantine-a awmna tur hmunhma nei lote chu Community Quarantine Facility/Government Quarantine Facility-ah anmahni sensoin an inkhung hrang ang.

F. Pawimawh dangte :
1. Deputy Commissioner-in a tul an tih chuan Containment Zone a puang thei ang a, VLTF ten Veng/Khaw bil inkharkhip leh khualzin luh phal loh an puang thiang lovang.
2. Zan lama pawn chhuah phal miah loh (curfew) hun chhung chu khauh leh zuala kenkawh tur a ni.
3. Zirna In leh Biak In te khar chhunzawm zel a ni ang.
4. Phalna neia pawn/khawlaia chhuak reng rengin uluk takin hmai an tuam tur a ni a, feet 6 aia inhnaihin tumah an awm tur a ni lo. Hei hian VLTF/Covid duty-te pawh a huam vek ang.
5. Damdawi lei, buhfai/ration lak, chawhmeh leh chiseh lei tura chhuah phalsakte tih loh, mipui nawlpui chu pawn chhuak lovin mahni ina inkhung/tawm tlat tur a ni.
6. Tumahin khawlaiah emaw thlahdah takin emaw chil an chhak tur a ni lo; chutiang tilui chu dan anga hrem an ni ang.
7. Puipunna lam thil reng reng huai hawt loh tur a ni. Hei hian inneih lawmna (reception), lungphun, anniversary / birthday lawmna, infiamna, lehkhabu tlangzarh, politics / pawl thila kalkhawmna leh intihhlimna chi reng reng a huap ang.
8. Inneih inkhawm, mitthi vuina leh khawhar inah mi 30 (sawmthum) aia tam pun khawm phal a ni lo.
9. Loh theih loh thil a nih loh chuan, kum 65 chin chunglamte, taksa hriselna lama harsatna nei sate, nau paite leh naupang kum 10 hnuai lamte chu mahni inchhungah inkhung/inkharkhip vek tur a ni.
10. Public park, picnic spot, gym, community hall leh intihhlimna/intawllenna hmun dang zawng zawng chu khar rih tur a ni.