Vawiin khan Lawngtlai District Magistrate Pu J. Hmingthanmawia, MCS chuan Kaladan Multi Modal Transit Project kawng siam mekah mipuite him zawk nan leh kawng siam hna chak zawka thawh a nih theih nan kawng siam lai huam chhunga motor luh khapna thu pek a chhuah.

Tun laiin RDS Project Ltd. Leh ARSS Company ten Kaladan Multi Modal Road siam hna an thawk mek a. He hnathawh mekah hian Blasting (Bomb) te an hman avangin accident leh intihpalh a hlauhawm hle a ni. Tichuan, he kawng zawha kal thinte him zawk nan leh an hnathawhte a lo chak zawk nan khapna thupek chhuah tula hriat a ni a. Hei vang hian Lawngtlai District Magistrate chuan Section 144 of Cr.PC, 1973 tlawh chhanin khapna thu pek a hnuai a mi ang hian a chuah a ni.

1. Mi tumahin he kawng siam mekah hian Motor eng chi pawh hmanga tui chawi, thing phurh, mau phurh, lung phurh etc. te an ti tur a ni lo .

2. Motor eng chi pawh he kawngpui ah hian dah/park leh kal phal a ni lo. Hei hian AOC Petrol Pump atanga tan in RDS/ARSS ho kawng laih chin zawng a huam ang.

3. He thupek zawm lo leh ngai pawimawh lo te chu Section 188, IPC dana hrem an ni ang. He thupek hian chhuah a nih atanga thla hnih chhung a huam ang.