No.4677/2020-2021

Mizoram sawrkarin Ni 01.09.2020 atanga 30.09.2020 chhung atana Lockdown kalpui dan tur kaihhruaina a lo siam tawh behchhanin Kolasib District chhunga bawhzui dan tur a hnuaia tarlan ang hian siam a ni.

A. Interstate Border:

1. Bairabi leh Vairengte kaltlang kawngpuite chu bungraw phur lirthei tan hawn a ni ang. Passenger phur motor tan erawh chuan screening leh quarantine chungchang fel taka ruahman anih zel theih nan Thawtanni, Ningani leh Inrinni apiangin 6:00AM atanga 2:00PM chhung hawn a ni ang.

B. Mizorama lo lutte screening leh quarantine chungchang:

1. Vairengte leh Bairabi kaltlanga Mizorama lo lut reng reng chu entry point ah Rapid Antigen Test hmanga medical screening kalpui chhunzawm tur a ni ang a, quarantine-na tur hmun ruatah quarantine tur an ni. Passenger pangngai (stranded traveler)-te erawh chu check gate-ah test paltlang lovin an quarantine-na tur hmun an thlen hunah RT-PCR Test tihsak an nih thung ang.

2. Quarantine dan tur fel taka ruahman anih theihnan Mizoram an rawn luh hmain mCOVID-19 mobile application mPASS-entry of persons emaw website: mcovid.mizoram.gov.in/pages/mpass/entry-of-persons ah in register lawk tur a ni.

3. Mizorama lo lutte quarantine dan tur chu Health & Family Welfare Department-in kaihhruaina a siam anga kalpui a ni ang.

4. Quarantine-a awm/thlen man, ei leh in leh test-na man pek dan tur erawh chu he office Order No. R.11011/40/2020-DC(K) Cov19 dated 31st July, 2020 angin kalpui tur a ni.

C. Zirna in, sakhaw biakna hmun leh mipui punkhawmna hmunte:

1. School, college, educational leh coaching institution-te chu khar chhunzawm an ni ang a, online distance learning erawh kalpui chhunzawm theih a ni.

2. Sakhaw biakna hmunah te chuan mipui punkhawmna huaihawt phal a ni lo. Zing tawngtai inkhawm erawh chu mi 50 (sawmnga) aia tam lo tan neih phal a ni.

3. Mitthi vuina, lungphun, inneihna (man hlan, inneih inkhawm leh reception), anniversary, pawl thila kalkhawmna, book release, etc. ah te chuan mi 50 (sawmnga) aia tam punkhawm khap a ni. Heng hmuna telte chhinchhiahna kimchang (hming, address, phone number leh kal hun te) ziahna bu/register chu a huaihawttuten an vawng tur a ni.

D. Bungraw chawkluh leh thiar chungchang:

1. Phai atanga bungraw lalut tur leh rawn phurlut tur reng reng chuan mCOVID-19 mobile application-a mPass hmangin declaration an thehlut tur a ni.

2. Driver leh handyman te chu Aarogya Setu-ah in register vek tur a ni.

3. Driver leh handyman, Mizoram atanga bungraw la tura zin chhuak thinte chuan bungraw lak hna an thawh chhung chu midang nen intlawhpawh lovin an thawk ang a, an awm lailawkna tur chu anmahni ruaitute kut a ni ang. Mizoram chhung atanga COVID-19 test-na negative result an neih veleh emaw load an lak hnuhnun ber atanga ni 14 hnuah midang nen an intlawhpawh thei ang.
4. Kolasib district chhungah chuan phailam leh hmundang atanga bungraw chawkluh reng rengte chu a bialtu VLTF-te remruatna leh hriatpuinain zan dar 6:00PM – 10:00AM chhungin hlanthlak thin tur a ni. Hemi hun chhung ni lo, hun dang leh mahni duh thu a VLTF hriatpuina lova bungraw hlangthla man an awm anih chuan dan anga hremna pawisa chawitir theih an ni ang.

5. State pawn lam lirthei driver leh handyman, phai atanga bungrua rawn thiar lut thinte chu an kalphung pangngai angin khaw pawn hmun remchangah anmahniin eirawng an inbawl chawp ang a, khaw chhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian an motor atanga chhuak lovin, midangte atanga metre 2 (hnih) tal a hlaah an awm tur a ni. Hemi chungchangah hian bungraw neituten mawh an phur ang.

6. A chunga tarlan driver leh handyman-te hian kawng laka harsatna an tawh thulh ah State Control Room (Toll free 1070, landline 0389- 2335842/2335837 leh mobile 9366331931)-ah phone-in an harsatnate an thlen thei ang. Kolasib district chhungah harsatna tawk an awm anih chuan Vanlalmuana, SDC (Contact No.-8415848210) hnenah an thlen thei ang.

E. Containment Area/ Zone Puan Chungchang:

1. The Mizoram Epidemic Diseases (COVID-19) Regulations,2020 in thuneihna a pek, Chief Secretary leh Deputy Commissioner-te lo chuan containment area/zone leh lockdown an puang thei lova, hei hian veng bil lockdown pawh a huam a ni.

2. A tul dan a zirin Deputy Commissioner-in Kolasib district chhunga khawi hmun pawh risk assessment mumal tak neiin containment area/zone-ah a puang ang.

3. Containment area/zone-ah te chuan Deputy Commissioner-in thupek a chhuah te chu zawm tur a ni.

4. Containment area/zone pawna lockdown puan a ngai anih chuan Central sawrkar rawnin State sawrkarin a puang ang.

F. Screening, Testing, Quarantine Leh Hri Veite Enkawl Chungchang: Kolasib district-a COVID-19 testing, quarantine mek leh hri paite enkawl chungchang; Covid Care Centre, Dedicated Covid Health Centre leh Dedicated Covid Hospital-te kalpui dan leh heng hmunhmate tihthianghlim chungchangah chuan Health & Family Welfare Department-in inkaihhruaina a siamte chu khauh taka kalpui tur a ni a. Hemi bakah hian Deputy Commissioner Office Order tihchhuah a ni bawk ang.

G. Hremna Dan:

He thupek zawm lo chu Disaster management act, 2005 hnuaia Section 51 atanga Section 60, The Mizoram (Containment & Prevention of COVID-19) ordinance, 2020 hnuaia Section 5 leh IPC section 188 hmangin hrem theih an ni.