No.4678/2020-2021
Vawiin chawhnu khan State Level Screening Committee on BADP chu video conferencing kaltlangin Chief Secretary VC Hall, MINECO building ah neih a ni. Meeting hi Chief Secretary Pu Lalnunmawia Chuaungo chuan a kaihruai a. Rural Development Commissioner and Secretary Pu Lalhmingthanga, Home Secretary Pi Lalbiaksangi, RD Director Pi Florence Zotluangpuii, DC te, DRDA Project Director te, Finance leh Home Department aiawhte leh RD Department mi pawmawihte an tel.
RD Director Pi Florence Zotluangpuii chuan meeting-ah hian power point presentation a pe a. He presentation atanga a lan danin Ministry of Home Affairs hian kum 2019-2020 chhung khan BADP ah Mizoram tan cheng nuai 3096 a ruahman a, Mizoram Sawrkar do letna (state share) cheng nuai 344 dah a ni bawk a. March ni 25, 2020 khan vanneihthlak takin sawrkar laipui hian cheng vaibelchhe 24.96 a pek belh bawk a. Kum 2019-2020 chhung atan hian sum hmuh tura beisei bakah hmuh belh nen Central Share belhkhawm hi cheng vaibelchhe 55.926 a awm a ni. Hetihlai hian a tam zawk K-Deposit-ah a lut a, cheng nuai 606.19 release tawh niin a bak zawng hi Mizoram Sawrkar Finance Department-ah release leh tura dil mek a ni.
Vawiin meeting-ah hian Ministry of Home Affairs chuan sawrkar kum 2020-2021 atang March ni 13, 2020 khan BADP-ah state hrang hrang tana sum bithliah a tifel tawh tih tarlan a ni a. Mizoram tan hian Central share cheng vaibelchhe 26.086 leh state share cheng vaibelchhe 2.896 ruahman a ni. BADP 2020-2021 chu Deputy Commissioner te kaihhruaina hnuaia din District Level Commitee on BADP leh Block Level Committee ten rawtna an siamte leh Ministry of Home Affairs-in fund a dah dana zira siamremin Draft Annual Action Plan chhawpchhuah a ni a. RD Block hrang hrang 15 te tan belhkhawmin cheng nuai 2796 dah a ni a. Monitoring, supervision leh inrelbawlna atan cheng nuai 28.40 ruahman a ni a. Hriat lawk loh, tul bik thil dang a lo awm thulha hman tur cheng nuai 72 ruahmanna siam a ni bawk.
BADP Guideline tharin a phut angin kum 4 chhung atana BADP kalpui dan tur ruahman lawkna, Ministry of Home Affairs-a thehluh chhunzawm tur chu chhawp chhuah a ni bawk a. Hei bakah hian BADP New Guidelines, 2020 behchhanin ram dang nena inrina (international boundary) chu MIRSAC puihnain Satellite Mapping hmangin ramri an teh a. Satellite mapping hmanga international boundary (imaginary line) atanga km 10 huamchhunga khaw awm zawng zawng chu BADP ah rin luh an ni dawn ta a ni.
He imaginary line atanga teh hian BADP hnuaia khaw rin luh thar 69 a awm ta a. Chung khaw 69 te chu :-
1) Ngopa RD Block hnuaiah -Ngopa,
2) Champhai RD Block hnuaiah: Chhungte, Selam, Tuipui
3) Khawbung RD Block hnuaiah: - Buang, Dungtlang, Khawbung, Leithum, Vanzau, Zawlsei
4) Hnahthial RD Block hnuaiah:- Aithur, Darzo, S.Lungleng, New Kawnpui
5) Bunghmun RD Block hnuaiah:- Bunghmun, Tuikawi
6) Lungsen RD Block hnuaiah:- Chhuahthum, Khojoysurychhuah, Nunsury II, Rolui, Sedailui, Sihphirtlang, Ukdasuri, Zodin
7) Siaha RD Block hnuaiah:- Siaha, Tisopi
8)Tipa RD Block hnuaiah:- Miepui, Tisi, Tokalo
9)Sangau RD Block hnuaiah:- Lungtian, Vartek
10) Lawngtlai RD Block hnuaiah: Tuithumhnar
11) Bungtlang S RD Block hnuaiah:- Damlui, Karlui II, Laitlang,
12) Chawngte RD Block hnuaiah:-Abudangasora, Arotinagar, Boganpara, Borakabakhali II, Borapansuri E, Chhotakabakhali, Damdep III, Gobasuri, Jarulsury II, Longpuighat II, Massuri, Palianasora, Parva II, Parva III, Parva IV, Samuksora
13) West Phaileng RD Block hnuaiah: Damparengpui, Kawnmawi, Khawhnai, Lallen, Lianbuang, Marpara Mizo Veng, New West Phaileng, North Chippui, Parvatui, Saithah, Huaitluang, Tuirum, West Phaileng, Zopui
14) Zawlnuam RD Block hnuaiah:- Andermanik, NW Bunghmun
15) Reiek RD Block hnuaiah:- Chungtlang leh Rulpuihlim te an ni.
Reiek RD Block hi tun hmain BADP ah rinluh a la ni ngai lova. BADP Guideline thar hnuaiah imaginary boundary atanga km 10 huamchhungah a tel tak avangin rin luh thar a ni.
