No.167/2021-2022  

Dated Serchhip, the 16th April, 2021: Vawiin hian 26- Serchhip (ST) AC bye election buaipui meka District Magistrate Press Briefing vawi thumna, inthlang tura inbuatsaihna peih fel niah hian DC Meeting Hall-ah neih a ni a, Pu Stephen Lalrinawma, SP chuan a telpui bawk. 

District Magistrate Pu Kumar Abhishek, IAS chuan Serchhip District Election Office atangin 26-Serchhip (ST) AC bye election atana Polling Party te chuan an hmanruate nen an duty-na hmun tur Polling Station te an thleng fel a, naktuk, vote thlak ni atana inbuatsaihna chi tin reng te chu peih fel a nih thu a sawi. Pu Kumar Abhishek, IAS chuan Zing dar 10 atanga Polling Party te chu an duty-na hmun tur zawnna (third randomisation of polling party) tihzawh a nih hnuah Polling Party tinte chu an chhuah hun tur hunbi duan sa mil zelin an hmanruate nen tirhchhuah an ni a, tun thlenga kan hriat chinah Polling Party te hian harsatna nei lovin an duty na hmun tur an thleng hlawm a ni, a ti. Election Commission of India-in vote thlak hunbi a rawn tihsei angin vote hi naktuk zing dar 7:00 am atanga tlai lam dar 7:00pm thleng thlak theih a nih thute, vote thlak dar bi ruat chhunga Polling Station area-a lut hman zawng zawngte chuan vote an thlak vek theih nan ruahmanna siam a nih thute a tarlang a. Covid19 patient vote thlak duhte pawh an vote thlakna tur Polling Station-a vote thlak tur midang zawng zawng ten vote an thlak zawhah Election Commission of India duhdan angin vote thlaktir tur an ni a, Ambulance leh medical duty te nen a hranpaa vote thlak tura phurh thlen tur an ni a ti bawk. 

Covid19 hripui inkai darh theihna lakah invenna, sawrkar leh Election Commission of India-in a duan te tha taka zawm a nih theih nan ruahmanna siam vek a ni a, vote thlak tura kalte chu mask/hmaikawr vuah vek tura beisei an ni a, Polling Station Area luh hmain an taksa lum zawng (temperature) endik vek an ni ang a, an kut sanitized sak niin kutkawr (plastic glove) pek an ni ang. Tin, Polling Party zawng zawngte pawh PPE kit an mamawh zat bakah thlaveng te nen ken tir vek an ni a, Covid19 laka himna dan te fimkhur taka kalpui tura hriattir leh zirtir an ni, a ti. 

Vote thlak niah hian vote thlakna khawl fel lo awm palha rang taka umzui nghal a nih theih nan Sector Officer pali te kianga awm reng turin EVM Engineer pali ruat an ni a, reserve Polling Party leh Reserve EVM/VVPAT te pawh fel fai tak siam vek an ni, tiin invenna lama hmalakna pawh a sawifiah a ni. 

He hunah hian Pu Stephen Lalrinawma, MPS, Superintendent pawhin venhimna lama hmalak tawh tlangpui sawiin vote thlak ni atana inbuatsaihna sawifiahna te a nei bawk.  Police ten nitin zantin patroling an neih thute, zu man tum hnih an neih tawh thute, zu bilhlai tihchhiat an neih tawh thute, Excise te nena Joint operation an neih thute a tarlang a. Striking Force te, Quick Response Team te lek Nakas ten hna an thawh reng thute pawh a tarlang a ni. 

Bawrhsap hi Pu Lalmuansanga Ralte, MCS, Addl. DEO leh Pi C. Laltleipuii, MCS, Master Trainer, Pi Dorothy Muansangi, MCS, Master Trainer ten an tawiawm a ni.

Kan tarlan thin tawh angin 26- Serchhip bialah hian Polling Station 29 awmin vote 19520 an zinga 9191 hi mipa niin a dang 10329 hi hmeichhia an ni a, Service vote 198 a awm bawk. Tun tum bye election-ah hian candidate paruk (6) an awm a ni.

District Election Officer Pu Kumar Abhishek, IAS, chuan 26- Serchhip (ST) AC-a vote nei zawng zawngte chu kokim taka vote thlak turin a sawm a ni.