3446/2023-2024
Mamit 23rd January, 2024 : Tunlaiin kan ramah leh thenawm state-ah ran hrileng mekin zinawm lam a pan theiloh avangin he hri laka Mamit District mipuite ranvulh an lo him zawk theih nan thupek chhuah leh tula hriat a nih avangin Pu V.L Remliana, District Magistrate, Mamit District chuan Section 144, Cr. PC, 1973 in thuneihna a pek angin a hnuaia mi ang hian khapna thupek a chhuah.
1) Mamit District chhungah ramdang (foreign countries), District dang leh State dang atanga vawk lalut/lei duh chuan District AH & Vety Department, Mamit atangin hriatpuina leh phaina lak hmasak tur a ni.
2) Ran damlo leh hrisel lo reng reng eitur atana hralh leh talh khap tlat a ni.
3) Ran thi reng reng Chinai thi / Bleaching Powder nen thuk taka phum tur a ni a, khamah emaw ramhnuaiah paih mai mai tur a ni lo.
4) Hrileng darh zel loh nana ran suat duh tan District AH & Vety Department, Mamit- ah dilna thehluh tur a ni.
He thupek bawhchhetute chu Section 188, IPC hmangin hrem theih an ni ang.
He thupek hian, hnuhlet anih loh chuan, chhuah anih atanga thla 2 (hnih) chhung a huam ang.
