3447/2023-2024

Aizawl, 23.1.2024: National Voters' Day vawi 14 na, kumin January ni 25 a hman tur pualin vawiin khan Aizawl district chhunga High School leh Higher Secondary School thlanbik a zirlaite tan Essay Writing Competition leh Painting Competition buatsaih a ni. Intihsiakna hi Govt. Mizo High School ah neih niin, Aizawl DC kaihhruaina hnuaiah District Education Office leh kaihhnawih dang department te telna committee chuan a buatsaih a ni.

Aizawl DC Pi Nazuk Kumar chuan intihsiakna hmun hi tlawhin a enfiah a. He intihsiakna hi zirlai naupang vote nei thei tep tawhte zingah mipui thlan ram rorelna ropuina leh mipui mawhphurhna an thinlung a tuh chu a tum Lian tak pakhat a ni. He intihsiaknaah hian High School paruk leh Higher Secondary School paruk atangin a vaiin zirlai 96 an tel a.

Essay ziah intihsiakna hi High School zirlaite tan thupui ah 'Importance of Voting for stronger democracy' thlan niin, Higher Secondary School zirlaite tan thupui chu 'No voter to be left behind' tih a ni a. Milem inziahsiak hi High School leh Higher Secondary School zirlai thliar a ni lo a. Intihsiakna thupui chu 'Nothing like Voting, I vote for sure' tih a ni.

Mizoram district dangah pawh National Voters' Day pual hian zirlaite tana intihsiakna hi kalpui a ni a. Voter's Day ah State pum huap a inkhawm buatsaih ah lawmman hi puan a sem a ni dawn a. Lawmman pakhatna in cheng sang nga, lawmman pahnihna in cheng sangthum, pathumna in cheng sanghnih an dawng dawn a ni.