3448/2023-2024

Khawzawl, 23rd January 2023: Vawiin khan District Level Committee on Fire Prevention chu Khawzawl DC Meeting Hall-ah Khawzawl Bawrhsap Pu K.Lalrohlua hovin an thukhawm a. Committee hian Kangmei venna hapta hman dan tur te, Lo Hal hun bithliah chungchang te, Kangmei ven kawnga awareness pek dan tur te, State leh District Level Fire Prevention Award chungchang te bakah District chhunga kangmei venna lama inelna endiktu tur chungchang te an rel.

Thutkhawm kaihruaitu Pu K. Lalrohlua chuan Kangmei Venna Hapta February ni 5 – 9, 2024 inkara neih tur chu inhrilhriat tharna chauh a ni tih mitin ten an hriat tlan a tul thu a sawi a. Mizoram bak chu ram dang kan nei lo a ni tiin, thing leh mau, nungcha te humhalh kawngah inzirtirna tha zawk kan mamawh tak zet a ni, a ti. Bawrhsap hian Khawzawl chu District fai ber a thlan a nih tawh thu sawiin; kangmei ven kawngah te, ramsa, nungcha, thing leh mau, leh luidung sangha humhalh kawngah pawh Mizorama titha ber ni turin tan lak a tul a ti a. Kangmei tichhuak emaw ramsa humhalh te tichereu zawnga che apiang te chu Khawzawl Bawrhsap hnenah emaw Khawzawl Wildlife Division hotute hnenah hrilhhre turin mipuite a ngen a, dan bawhchhiatna report-tu te hming chu thup a ni dawn a, lawmman tha tak pek an ni bawk ang a ti.

Committee hian Kangmei Ven Hapta hawnna programme chu February ni 5, 2024 chawhma dar 11:00 hian Khawzawl Electric Veng YMA Hall-ah neih ni se tiin a rel a. He hunah Khawzawl khaw chhunga VC member leh tlawmngai pawl (YMA, MHIP, MUP) zawng zawng te, Sub Hqrs YMA, District MUP, Sub Hqrs MHIP OB te bakah Khawzawl District chhunga VC tin aiawh te TA/DA pein sawm ni se, he hunah hian Pu Lalfakzuala, Addl DC chu khuallian ni se tiin a rel a.

Lo hal hun bithliah chungchangah Committee chuan State Level Sub-Committee on Fire Prevention-in a lo rel tawh angin March ni 15 aia tlai loah lo hal vek turin hriattirna siam ni se tiin a rel a. District chhunga VC te thehloh ram ( mahni huan lo ram vat etc) te chuan February thla chhunga lo hal vek tiin a rel bawk. Lo hal chungchang hi DC Office in CrPC Section 144 kaltlangin Prohibitory Order a chhuah ang a, VC tin ten report form kawlin dan bawhchhia te chu DC Office in concern Judicial District Magistrate kaltlangin action lak a nih theih nan hma a la ang tiin thu dah a ni.

Kangmei Ven Awareness Campaign hi print, audio, visual leh social media kaltlanga neih tur a rel a ni a. Khawzawl District chhunga Office zawng zawng ten Kangmei Ven hapta pualin thutiam lakna hun February ni 5, 2024 chawhma dar 11:00 ah neih theuh tur a ni.

Kangmei ven kawnga hmala tha khua pathum te hnenah District Level Fire Prevention Award hlan a ni ang a, he mi thlang chhuak tur hian committee hian ‘Monitoring Committee’ a din nghal a. Khawzawl District chhunga khaw tin te chu ram pum huap ‘ State Level Fire Prevention Award’ pawh dawn theih tum theuh turin Khawzawl District Level Committee on Fire Prevention chuan a ngen a ni.

Vawiin Committee ah hian  District Level Committee on Fire Prevention member te an tel kim hle a ni.