Nimin (11 November, 2014) khan Health Department buatsaihin kumina Champhaia District Mental Health Programme neih tur in ruahmanna kal mekah ‘Sensitization Training on Mental Health cum Awareness Campaign’ chu I&PR Conference Hall-ah tan a ni a, he hunah hian Champhaia thuthar thehdarhtute tan rilru hriselna chungchanga inhrilhriat leh inzirtirna neih a ni.
Training kaihruaitu Dr. C. Zirliana, CMO Champhai District chuan Sorkar laipuiin rilru hriselna ngai pawmawhin kum 1982 khan National Mental Health Programme chu a lo kalpui tawh thu a sawi a. Mizoram chhung District level-ah chuan kum 1999 atang kalpui niin, kumin hian Champhaiah pawh kalpui tan a nih tur thu leh, hnathawktute pawh lak fel tawh niin, District Hospital-a inkhuar tura ruahmanna siamfel a ni tawh thu a sawi.
Dr. Robert L. Khawlhring, SNO (Mental Health) chuan zirtirna hi pein, mihring hriselna chuan taksa bakah rilru hriselna a huam thu leh, rilru lama hrisel lohna hi mi pali zela pakhatin an vei anga chhut a ni tiin, hei vang hian rilru hriselna hi ngaih pawimawh a tul thu a sawi a. District Mental Health Programme hi rilru lama harsatna neite bakah an chenpuite tana hman tangkai theih tur a ni tih sawiin, he Programme kalphung tur leh ruahmanna hrang hrangte a tarlang bawk.
Dr. Lalnuntluangi, SPO (NPCDCS) chuan District Mental Health Programme kalphung te leh endik an nih dan turte te chipchiar takin a tarlang a. Champhaia kalpui tan mai tur NPCDCS (National Programme for Prevention and Control of Cancer, Diabetes, Cardiovascular Diseases and Stroke) chungchang a tarlang nghal a. National Family Health Survey zirchianna in a tarlan danin Mizoramah kum 20 chung lam zunthlum vei hi mi za zela 5.7 awmin, thisen sang hi khawpuiah mi za zela 31.1 in an vei a, thingtlangah mi za zela 23.5 in an vei bawk a. Heng natna do nan NPCDCS hi district hrang hranga kalpui tura hmalak mek a nih thu Dr. Lalnuntluangi chuan a sawi a ni.
Training-ah hian Pu Lalhmingmawia Pachuau, President MJA Champhai District chuan sorkarin mipui vantlang hriselna tura programme thar Champhaia a rawn telh chu lawmawm a tih thu leh, thuthar thehdarhtute chuan a theih ang anga tawiawm zel an tum thu a sawi bawk.
Champhai District Mental Health Programme-ah hian thawktu mi pasarih awm tur a ruahman niin, training hi vawiinah YMA tan neih leh niin, MHIP leh Health Staff te tan pawh neih chhunzawm a ni bawk ang.
