Vawiin chawhnu khan Aizawl DC's Conference Hall-ah AMC huam chhunga Local Council pathuma Bye Election neih tur chungchangah  Aizawl District Bawrhsap Pu Vanlalngaihsaka, District Municipal Election Officer ni bawk chuan Election Official te leh Mizo People's Forum(MPF) General Headquarters bakah  heng veng pathuma MPF Local forum hruaitute a kawm.

Meeting kaihruaitu Pu Vanlalngaihsaka, District Municipal Election Officer chuan inthlan pangai leh bye-election kalpui dan chu thil ang khat tho a nih avangin fimkhur taka kalpui ngei ngei tho a ngai tih a sawi a. Tun tum Local Council Bye Election-ah pawh inthlanna thianghlim taka kalpui a nih theih nan MPF chu  thawhpuiah a sawm a. Election official te leh MPF hruaitute inkawmnaah hian inpuahchahna kal mek leh rawtna te ngaihthlak a ni a. Tum dang ang bawkin Polling Station tinah MPF te chu Election hlawhtling taka kalpui a nih theih nan  an duty leh dawn a ni.

State Election Commission in ruahmanna a lo siam tawh angin  II/1-Chaltlang, IX/3- Chhinga Veng leh XIII/3- Kanan Venga Local Council Seat ruak te hnawhkhat turin August 30( Zirtawpni) khian zing dar 7 leh tlai Dar 4 inkarah vote thlak a ni dawn a. II/1-Chaltlang atan polling station 4 - Govt Chaltlang Higher Secondary School leh Govt Chaltlang Middle School-ah, IX/3- Chhinga Veng atan Polling station 5 - Govt Chhinga Veng Middle School leh KVM High School-ah leh XIII/3- Kanan Veng atan Polling Station 3- Kanan Community Hall, Govt Kanan Middle School leh Govt Kanan Primary School-ah te siam a ni dawn a ni.