Nimin  khan D.C Conference Hall, Mamit-ah Pu John Rotluangliana, Minister Transport, FCS &CA, Tourism Bialtu MLA  hovin Mamit District Planning Committee thutkhawm a ni a, Pu V.L Robiaka, Chairman ZIDCO, MLA Dampa Constituency  chu meetingah hian a tel bawk.

Meeting-ah hian  NEDP hnuaia hmalakna peng pakhat Village Level Development  Programme (VLDP) Streering Committee-in a   thlan angin   Mamit Distric-a hmalakna tur ngaihtuah a ni a. Hmalak hmasakna tur atan  hian  Dampa tlangdung, Saikhawthlir tlangdung, Phuldungsei tlangdung, Kawrtethawveng tlangdung, Reiek tlang dung bakah Darlung tlangdung-a khaw hrang hrang awmte tan hian hmasawnna hna kalpui ni se tih a ni a, District chhunga hmasawnna hna thawh  rualkhai taka a kal theih nan hian District Research Officer chu District dinhmun survey-a  chiang tak lo zirin Statistical Data rintlak tak lo nei  turin committee chuan a  ti a.  Khawtina hmasawnna hna a nih tur ang taka a kal theihnan hian  a tul dan a zirin District Level ah  leh Village council level ah te  Society angin  Project Implementing Unit din ni se tih  a ni bawk. 

Vawiin meeting-ah hian Mamit District chhunga Department hotute chuan an hmalakna Annual Action Plan bakah an  harsatna hrang hrangte ngaihthlak niin, Bialtu MLA chuan District chhungah ei leh bara kan intodelh zawk theihnan ranvulh uar tur leh leilung hausakna hmang tangkaia thlai nget phun uar lama hmala turin a chah a ni. Sericulture Department hnuaia pangngang khawi chu eizawnna tlak tak a nih avangin inzirtir uar tur leh District Officer tinte chu an huam chhung theuh te a hmunah kalchilha fangchhuak turin a chah a, chu chuan hmasawnna ruhrel siamna kawngah  nasa takin hmalak a ti awlsam dawn a ni a ti.

Meeting hi Pi Lalbiaksangi, Chairman District Planning Committee / District Bawrhsap ni bawk chuan a kaihruai a, Meetingah hian Mamit District chhunga Sawrkar Department officers te an tel a ni.