Nimin chawhnu khan Pu NK Prasad, General Manager, NF Railway (Construction) leh Northeast Frontier Railway hotute chuan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Raj Bhavan-ah hmuin, Sairang-Bairabi railway line siam mek dinhmun an hriattir.

Sairang-Bairabi railway line chu Governor chuan Mizoram tana danglamna nasa tak thlentu a nih ngei a beisei thu a sawi a. Hnathawh mekte chu tun aia chak zawk leh a hun ruahman lawk anga zo hman hram turin a chah a. Station pali sak tur te chu hmundang aia changkang leh tha, danglam bik riauna nei, ram leilung nena inmila siam theih nise tiin a duh thu a sawi a ni.  

He meeting-ah hian land acquisition 88% leh earthwork (282 lac cum) 77%  (204 lac cum) zawh a nih thu tarlan a ni a. Minor bridge (98 nos.) chu 34% dawh zawh tawh niin, major bridge (52 nos.) 20% dawh tawh a ni. Tunnel 28-te chu a vaia belhkhawmin km 11.6-a thui a ni a, an zinga thui ber chu km 1.82 a ni. He railway line-ah hian rel darkar khata km 100-a chak tlan thei tura ruahman a ni tih tarlan a ni bawk.