Vawiin chawhma dar 11 khan Champhai District Prohibition Committee Pu T.V.Fambawl, Champhai D.C hovin a office ah neih a ni a. Member te an kal tha hle, thu pawimawh tak tak rel ho a ni.

Thla leh maia lo thleng tur Krismas leh kumthar vuak veta ruihhlo laka fihlim theihna tur leh Halpuah leh halmawi etc. khap chungchanga hmalak dan tur te pawh rel ho nghal a ni.

He thukhawm kaihruaitu Champhai D.C Pu T.V.Fambawl chuan Champhai chu ramri bula awm niin, km 20 chuang leka hlaah duhtawka zu lei tur leh in tur a awm reng a. Sapthei zu etc a lo awm bawk nen, chutiang hmun nimahse Champhai khawtual tam tak chu heng ruihtheih thila fihlim an awm chu lawmawm a tih thu sawiin kan hma lawk krismas leh kumthar vuak vetah phei chuan heng ruihtheih thil laka mitin an fihlim theihna tura tan lak nasat a tul thu a sawi a ni.

Excise Department hotute pawhin hemi kawnga hma an lak dan tur an siam vek tawh thu sawiin dan anga kal zel chunga zu zuar, zurui leh buaina siam te tumah an dim dawn loh thu sawiin heng ruihtheih thila inhnamhnawih sawrkar hnathawk te chungah pawh dan anga hmalak vek an tum thu sawiin, zu rui, zu zuar leh buaina siam te chuan thiam an chang dawn lo hrim hrim a ni.

NGO lam pawhin an hmalak dan tur hrang hrang sawiin vengtin ah duty ten Police, Excise leh magistrate te an pui dawn a. Ruihtheih thil hrang hrang laka Champhai khawtlang a lo fihlim theihna tura hmalakna tur hrang hrang an sawiho nghal a ni.

He meeting ah vek hi an Mizoram state sawrkar rorelna bawhzuia halpuah leh halmawi etc khap chungchang rel ho nghal a ni a. Champhai hi chuan a lo thlawna sum hman ralna anih hi hriain a uar lo pawl tak khua anih avanga a lawmawm hle laiin State sawrkar phal loh anih avangin krismas leh kumthar vuakvetah pawh Champhai khawpuiah chuan khap bur tur a ni. Sumdawng hote pawh tumah in zawrh loh tur a ni a, zuar lui te chu dan anga man sak zel tur a ni. Hemi kawngah hian kum dang zawng aia khauh zawka kalpui tur a ni.