Vawiin khan Mizoram puma Social Audit, Rural Development Department hnuaia District Resource Persons te tan "Social Audit" neih dan tur training chu DRDA Conference Hall, Aizawl-ah neih tan a ni.
Programme hawngtu Pi K. Lalrinzuali, Jt. Secretary, R.D Deptt. chuan Rural Development Department hnathawh ber chu mirethei leh chanhai, hmun kilkhawr bera cheng te pawhin an chhawr tangkai tur thil a ni ber a ti a, heta thawktute chu hlawh hmuh nan chauh thawk anga inngai lova, midang tana thawk an ni zawk a ni tih inhre nawn fo turin a chah. Nikum lamah Sorkar laipui lamin an Budget 46% zeta an tihtlakhniam thut avangin MGNREGS pawhin tuarin, an inhlawh tam thei lova. Tunhma lama Mipuiin inhlawhna chauh ngaih pawimawh thin chu tunah chuan mipui inhlawh tir chunga Asset tha siam tura tih a nih tak zawk thu a sawi.
He hun kaihruaitu, Pu Laltharmawia, Director, SAU chuan Mizoram-a Social Audit ti turin 2012 khan Mizoram Social Audit, Transparency and Accountability (MISSAAT) din anih tawh thu leh a tak takin 2013 khan a function tan chauh thu a sawi a. Tunah hian Social Audit Manual buatsaih anih tawh bakah kumin Financial Year chhungin khaw 80 chuangah Social Audit kalpui a ni tawh a, tunah hian khaw 100-ah neih leh turin ruahmanna siam mek a ni tiin, Audit Report pawh bu 3 sawrkarah submit tawh a niin, bu 1 hi submit leh mai tura peih a ni tawh bawk. Social Audit hian tunah hian Scheme pathum- MGNREGS, IAY & IWMP-a hnathawh a endik mek a. Heng scheme ah hian sorkar sum nuai sang tam tak hman mek zel anih avangin, diktak leh felfai taka hman anih theihnan Social Audit Unit chuan hma a la mek a ni, a ti bawk.
Vawiin Training hi ni 1 theory-in neih anih bak hi chu Sairang, Sihhmui leh Sairang Dinthar-ah practical in Social Audit an ti ang a, tunkar Zirtawpni hian DRP te hian Report siamin, hotu lian zawk awm laiin an Report chu pharh a, sawihona leh thil diklo siamthatna hun Exit Conference an nei leh dawn a ni.
He training ah hian Pu K.T Pakhuangte, Dy. Director, SAU & Principal, ETC (P); Dr. Lalhruaitluangi Sailo, Asst. Director, SIRD; Pu K. David Lalthanmawia, SRP leh Pi R. Lalchhuanmawii, SRP ten an zirtir a ni.
