Vawiin chawhnu khan Mizoram Remote Sensing Application Centre (MIRSAC), Directorate of Science & Technology buatsaihin vansang lam thiamna (Space Applications) tangkai zawka hman dan tur inkawhhmuhna, Brainstorming Workshop chu Chief Secretary leh MIRSAC Governing Body Chairman ni bawk Pu Lalmalsawma hovin Secretariat Coference Hall-ah neih a ni.
Chief Secretary Pu Lalmalsawma chuan hmasawnna tluantling nei turin tunlai science thiamna hman tangkai zel a pawimawh a, India sawrkar chuan kum tin thlalem (Satellite) siamna leh kahchhuahna atan cheng vaibelchhe tarn tak a sen ral avangin hman tangkai zel a ngai pawimawh a, a dah pawimawh deuh deuh dawn bawk a ni, a ti a. Heng thlalem thlalak hmanga hmasawnna tur ruahmanna kalpui zel hi kan ke penna tur a ni tiin hetiang thiamna hmang tangkai tura MIRSAC Scientist ten kawng min kawhhmuh hmang tangkai zel turin development Department hrang hrang te chu a chah a ni.
Workshop kaihruaitu Dr. C.Vanlalramsanga, Secretary, Planning leh MIRSAC Governing Body Vice Chairman ni bawk pawhin thu sawiin hmasawnna tura ruahmanna hi Science thiamna bulthuta hman a nihin a hlawhtling thin a. Dawhkan atang ringawta hmasawnna ruahman hi a tha tawk lova, vansang lam thiamna (Space Applications) hmanga hmasawnna tur ruahmanna kalpui a nih chuan nasa zawkin ruahmannate hi a hlawhtling thin a ni, a ti.
Dr. R.K.Lallianthanga, Chief Scientific Officer leh Member Secretary, MIRSAC chuan Workshop neih anih chhan sawiin Prime Minister Pu Narendra Modi rawtna angin India ramin tun aia nasa zawka hma a sawn theih nan Vansang lam thiamna, Brainstroming Workshop hi neih a ni, a ti a. He Workshop sawihona atang hian Department hrang hrang ten an mamawh an sawi atanga a theih ang anga hmalak dan kawng dap ho tul a tih thu a sawi.
He Workshop-ah hian Pi Hmingthanpuii, Senior Scientist chuan Remote Sensing leh Geographic Information (GIS) nihphung leh a hman tangkai dan presentation hmangin a entir a. Dr. Lalnunsiama Colney, Principal Scientist pawhin leilung hausakna chi hrang hrang map a lantir dan leh hmasawnna atana ruahmanna (Planning) siam dan presentation hmangin a entir bawk a. Pu Z.D.Laltanpuia. Scientist pawhin tui leh leilung awm dan map hmanga siam dan leh chhiatrupna lo thlen thulh a inbuatsaih dan presentation hmangin a entir bawk a. Pu Edward Lalzuithanga, Senior Scientist chuan tunhnaia vansang lam thiamna hman tangkai zawk dan te presentation hmangina entir bawk.
He Workshop ah hian Development Department hrang hrang Secretary te, Director te leh Officer thahnem tak an tel a. Tun aia tangkai zawka vansang lam thiamna hman tangkai dan turte an sawiho a ni. Sawihona tlangkawmin Secretary, Planning Department Dr. C.Vanlalramsanga chuan, a theih ang anga MIRSAC hmang tangkai turin line Department hrang hrang te a ngen a ni.
