Social Audit Directorate buaisaih, District pali-Aizawl, Lunglei, Lawngtlai leh Saiha District huam chhunga  District Resource Persons training chu vawiin zing dar 10 khan I&PR Conference Hall ah Pu Lalhmingthanga IAS, Secretary, Rural Development chuan a hawng.

Rural Development secretary chuan, Central Sorkarin social audit hi a ngaih pawimawh em avangin state tinah Social Audit Directorate din vek turin state sorkarte a hriattir a, Mizoramah pawh kum 2012 October thla khan a din ve ta a ni, a ti a. Social Audit-in a tum pawimawh zualte sawiin Sorkar-in sum tam tak seng a siam programme/scheme te chu langtlang taka thil tih leh mawhphurtuten a nih ang taka mawhphurhna an hlenchhuak ngei theihnan a hma lak te, thingtlang mi mirethei ber pawhin an harsatna te leh an lungawi lohnate zalentaka an sawi chhuah ve theihnan leh dik lo taka sum hman venhim nan a ni, a ti.

He training hawnna inkhawm hi Pu Laltharmawia, Director, Social Audit Unit chuan a kaihruai a. He training ah hian Pu Khuangthansanga Pakhuangte, Deputy Director, Pu K. David Lalthanmawia, Pi Lalchhuanmawii State Resource Persons leh IWMP lama sawmbikten an zirtir dawn a ni. He training-ah hian District Resource Persons 36 an tel a ni.

Social Audit hi kum khat chhungin vawi hnih neih tur a ni a, hemi hna thawk tur hian Social Audit Directorate hian State Resource Person 2, District Resource Persons 64 leh Village Resource Persons 1153 a nei mek a. Heng Resource Person-te hian Mizoram khaw tinah Social Audit hi kum khatah vawi hnih an nei ziah dawn a ni.

Tun dinhmunah chuan social audit-in a audit tur Scheme te chu MGNREGS (Niza inhawlhna), IAY (Hmeithai insakna) leh IWMP-te a ni.