State Level Committee on Green Mizoram chu vawiin khan Chairman Pu Lal Thanhawla, Chief Minister kaihhruainain a office conference room-ah meeting pawimawh tak an nei.
Chief Minister chuan Green Mizoram Daya thing tiak kan phunte hi a puitlin ngeina turin enkawlzui a pawimawh hle a ni a ti a. Mi inthlahdahte avang leh lo hal vang leh roadside reserve te kan ngaihpawimawh tawk thin loh avangin kangmeiin a tichhe thin hi a pawi thei hle a ni tiin, mi tam zawkin tunah chuan humhalh nachang kan hre chho ta hi a lawmawm hle a ni a ti.
Meeting chuan kumin 2015 Green Mizoram Day thupui atan ‘ I dam khawchhuah nan thing phun rawh’ tih chu thlan a thlang a. A hmanna ni turah ni 11 June 2015 (Ningani) ruat a ni a, a hmun turah Hmuifang Tourist Complex, chawhma dar 11 a.m. a ni ang. He ni hian district dang zawngah pawh hmang ve tura beisei an ni. Thing tiak phun turte hi an dam khawchhuah ngei nan departmentte bakah a ram neitute che ber turah hmang thiam ila meeting chuan a ti a. Green Mizoram ‘logo’ hman reng tawh tur, a lem phochhuah pawh meeting hian a pawm a ni. Thing tiak phun tur chu a leilung leh sik leh sa ngeih tur chi E&F department in thlang se an ti bawk a. Heng bakah hian State Level on Grenn Mizoram Day hian district levela kumin 2015 chhunga kangmei ven hna, ‘Fire Prevetion Awards 2015’ ti tha zual district pathum hnenah he hemi ni hian lawmman hlan nise an ti bawk a. Lawmman hian certificate bakah pawisa fai a ken tel dawn avangin lawmman dawngtuten kangmei venna kawnga an hmalak zelna atan hmang se meeting chuan a ti bawk. District levelah pawh district huam chhung theuha khaw ti tha zual pathum thlangin lawmman pawh hlan ve se an ti bawk a ni.
Green Mizoram Day hi kum 1998 atanga kumtin hman thin a ni a. Kum 1999 - 2014 chhung khan thing tiak 36,06,302 phun tawh anih thu meetingah hian tarlan a ni a. Thing tiak phun thenkhat a puitlin loh chhan bera hriatte chu lo hal vanga kangmeiin a tih chhiat, kawngpui leh hmasawnna dang dang siam vang, enkawlzuina tha tawklo leh thing tiak thlan fuh loh vangte nia tarlan a ni bawk.
