Lawngtlai District Agriculture Office buatsaihin vawiin hian Rashtriya Krishi Vikas Yojana (RKVY) hnuaia Bungtlang South BDO leh Chawngte BDO Area chhunga kuthnathawktu thlanbik mi 100 te tan Ngengpui Oil Palm chinna hmunah District RKVY Farmer Study Tour buatsaih a ni.

He Tour kaihruaitu Pu H. Joela, Lawngtlai DAO chuan, Lawngtlai District hi Mizorama thlai chinnana hmun tha berte zinga mi a ni a, thawk peihte tan hmakhaw eng tak a awm reng a ni, a ti. Oil Palm chingtute vanneih zia sawiin vawiina kuthnathawktu thlan bikte Tour an buatsaih sakna hmun atanga Oil Palm tharchhuahte pawh Ruchi Soya Industries Limited ten a hmunah an lei sak nghal zel a ni, a ti.

He Study Tour-ah hian Agriculture lama mithiamten loneitute chu Oil Palm chin dan leh a enkawl chhoh dan a taka thawk chungin an zirtira, Oil Palm enkawl puitling tawhten an hnathawh dan te sawiin hun an hmang ve bawk.

Lawngtlai District ah hian kum 2010 atang kha Oil Palm hi chin tan ani a, tunah hian ram Hectare 3800 vela zauah chhungkaw 2000 dawnten an ching mek a, hralh thama tharchhuak tawh chu chhungkaw 20 vel chauh an la nit hung. Kumin bikah hian Hectares 500 a zauvah chinbelh hman tumin tan lak mek a ni bawk.

Oil Palm chingtute tharchhuah hi Ruchi Soya Limited hian Kg 1 Rs 5.50 zelin kumin atang hian an lei tawh dawn a, a hma chuan Kg 1 Rs 4.75 in an lei thin a ni.