Vawiin khan Mizoram Agricultural Management & Extension Training Institute (MAMETI) buatsaih, Pradhan Mantri Krishi Sinchayee Yojana (PMKSY) Scheme chungchanga training chu Agricultural Technology Management Agency (ATMA) hnuaia Deputy Project Director leh Block Technology Manager-te tan Agriculture Committee Room, Directorate of Agriculture-ah Agriculture Department Joint Director Pu R.L. Thanzuala’n a hawng a. He training hian ni thum a awh dawn a ni.

Training hawngtu Pu R.L. Thanzuala chuan thu sawiin ATMA chu la naupang tak nimahse Agriculture leh a kaihhnawiha mithiam tak tak hlir awmna a nih avangin loneitute hmasawnna atana hmanraw pawimawh tak an nih thu a sawi a.

Training hawnna programme hi MAMETI Director Dr. H. Saithantluanga’n a kaihruai a. Thingtlang loneitute chawikanna tur a Scheme lian tak mai sawrkar laipuiin a siam chu lawmawm a tih thu a sawiin, Chairman chuan he scheme hlawhtlinna atana pawimawh ber chu mipuite an ni tih a sawi a, mipuite hnena he scheme chungchang hrilh hriaa a tul anga training pe tura Central sawrkarin ATMA a thlang chu thil lawmawm tak, huphurh awm bawk si a ni, a ti a. Training hun chhung tawite chu hmang tangkai a, loneitute zirtir ve nghal thei ngei tura inchher hriam theuh turin kalkhawmte a chah bawk.

PMKSY hi Union Cabinet-in July ni 1, 2015 khan a lo pawm tawh a. Tun hmaa huan lo rama tui renchem dantur leh awmze neia semdarhna tura ruahman scheme hrang hrang heng IWMP, AIBP, CAD leh OFWM, Department/Ministry hrang hrang enkawlte chu a enkawltu ngai reng siin, awmze nei zawk a thawk ho turin PMKSY ah hian chhun fin a lo ni ta a ni. He Scheme-in a tum bul ber chu loneitute buh leh bal thar tihpun a, thingtlang mite hmasawnna siamsak a nih avangin PMKSY Nodal Department atan Agriculture Ministry/Department chu thlan a ni. He Scheme thar hnuaia tui renchem dan leh buh leh balin a ngeih tawk, tui hek lo zawng si a chin dan te, a scheme hlawhtlinna tura mipuite hriat tur hrang hrangte hrilh hria a, training pe turin sawrkar laipui chuan ATMA)hi a ruat a. Tuna ATMA Staff ten training (Trainers Training) an neih zawh hian Mizoram pumah loneitute tan training an pe leh dawn a ni.

He training hi ATMA Deputy Project Director 14 leh Block Technology Manager 22, an vaiin mi 36-te tana buatsaih a ni a. Dr. Jotish Nongthombam, Agriculture Engineer Scientist, KVK, Selesih chuan tunlai thiamna hmanga tui dahkhawl dan tha zawk leh renchem taka semdarh dan, Mizo mipuite hman theih ngei tur angte entirin zirtirna a pe. Mizoram sawrkara PMKSY implementing department - Minor Irrigation, Horticulture leh Rural Development Department a mithiamte pawhin ATMA Staff ten training an pekna tur atana an hriattur pawimawhte zirtirna hrang hrang an pe bawk.