Mizoram sorkara Disaster Management & Rehabilitation Department leh National Disaster Management Authority (NDMA) tangkawp chuan naktuk ni 24.2.2016 (Nilaini) khian Lunglei-ah ‘Earthquake Mock Drill’ an huaihawt dawn a. Lunglei DC Office inchung atangin chawhma dar 11:30 velah siren tihrik a ni dawn a, lirnghing awm anga lemchangin khawpui chhung a buai mup mup dawn avangin mipuite lo chiai lo turin District hotute chuan an hriattir a ni. He lirnghing awm thut pawha sorkar, tlawmngai pawl, medical, police leh NGO te an inralring theih dan tur leh chhanchhuahna/chhawmdawlna hnathawh dan tur zirna ‘mock drill’ hi hmun 4 - Lunglei Sobji Market, Chanmari; Saikuti Hall, Venglai; JB College, Bazar Veng leh Serkawn Road (Pu LT Muana In thlang) ah te huaihawt a ni dawn.

Naktuk ‘mock drill’ neih tur atan a kaihhnawih District officials, Police, Medical, National/State Disaster Response Force, NGO leh volunteer hrang hrangte chuan nimin leh vawiin khan Lunglei DC’s Conference Hall-ah training an nei a. He training-ah hian DM&R Principal Secretary Pu PC Lawmsanga, IPS bakah NDMA Sr.Consultant Pu Shivaji Singh, Jt.Adviser Pu DS Sindhu leh Dy. CO, 1st Bn NDRF Pu Marut Pandey ten rawn hmanpuiin disaster management leh mock drill chungchang chipchiar takin an sawipui a ni.

DM&R Principal Secretary Pu PC Lawmsanga chuan NDMA-in Lunglei-ah hetiang ‘mock dril’l neih theih nana hun tha a siam sak leh NDRF-te rawn hruai a, chhanchhuahna hna thawh dan tur inzirtirna hun hman thei tur chu a vanneihthlak hle a ni, a ti a. Hman deuha thenawm state-a lirnghing na tak (6.7 Richter) nghawng chu Mizoramah pawh kan hre pha a, chuvangin hetiang chhiatrupna hi Mizoram pawh engtik lai pawhin thleng thei tih hriain state sorkar hotulu ber te pawhin an ngai pawimawh hle a ni, a ti bawk. Chhiatrupna thlen thut pawha lo invendan tur chungchang hi school zirlai zawng zawngte pawh a thei anga zauvin zirtir a tul a, lirnghing awm pawh a ‘Rule of DROP COVER HOLD’ hi mi zawng zawngin an hre tur a ni tiin Pu Lawmsanga chuan lirnghing awm hian inchhung atanga pawna tlanchhuah hi a him ber lo tih hre theuh turin mipuite a chah. Tun hnu hian chhiatrupna thlen chungchangah sorkar hmalakna hi kawng 3-a then a ni a, chungte chu - 1). Pre-disaster prevention/preparedness (chhiatrupna awm loh tura inven dan leh a awm hma pawha lo inralrin dan tur), 2). During disaster operations & mitigation (chhiatrupna thlen laia hnathawh dan leh a nghawng na lutuk laka inven dan tur) leh 3). Post-disaster relief & rehabilitation (chhiatrupna thlen hnua chhawmdawlna leh mamawh phuhruk dan tur) a ni tih a sawi bawk.

NDMA Sr.Consultant Pu Shivaji Singh chuan khawvel puma chhaitrupna thlen thuta chhanchhuahna leh chhawmdawlna hna thawk thei tura trained chhuak ngat pawl lian ber chu NDRF ( a ni a; Japan rama nuclear plant puak tum pawha an disaster response force-te luh ngam lohnaah NDRF-te chu koh an nih angin mi engemawzat an chhanchhuak bakah mitthi ruang tam tak an lachhuak thei a; hemi avang hian Japan sorkar pawhin chawimawina hlanin kha Ni vanduaithlak tak hriatrenga inkhawm an hman pawhin NDRF-te sawm tel ziah an ni tih a tarlang a. Mizoram Police mi 729 laiin Disaster Response Force training chhuak an ni a, anni bakah 1st Bn NDRF Team 1 chu Aizawl-ah engtiklai pawhin inring engin an inkhuar a ni , a ti. Lunglei-in District Level Disaster Management Plan tha tak a nei chu fakin Pu Shivaji Singh chuan he Plan hi ennnawn fo a, belh ngai leh mamawhte ziahlan turin District officials te a chah.

District Incident Commander Lunglei DC Pu Abhijit Vijay Chaudhari pawhin thusawiin Mizoram chu lirnghing awm theihna hmun hlauhawm berte zinga tel a nih avangin sorkar leh mipuite chu inralring reng tur an ni a, naktuka mock drill neih tur pawh rilru leh tihtakzeta tanlak theuh a ngai a ni, a ti. Vawiin Training neihah hian Lunglei SP Pu Zosangliana, Lunglei CMO Dr.VLMS Dawngliana, NDRF Dy.CO Pu Mankut Pandey bakah Sub-Hqrs YMA Search & Rescue Team Leader Pu Lalramsanga ten Disaster Management Plan (chhanchhuahna hna thawhdan tur) an siam theuhte chu an sawizau bawk a ni.