Vawiin hian Serchhip DC Pisaah Serchhip District Road Safety Committee te chu an Chairman leh Bawrhsap ni bawk Dr. Lalrozama, IAS hovin an thukhawm a, Road Safety chungchanga hmalak dan tur hrang hrangte an rel.

Chairman Dr. Lalrozama, IAS chuan, India ram chhungah kawnga chetsualna a tam a, nunna, sum leh pai leh hunk an hloh hi a tam em em a ni. Mizoram leh Serchhip District chhung ngeiah pawh vanduaina hi a thleng fova, chuvang chuan heng chhiatna laka kan lo hima, hma kan sawn theih nan Road Safety Committee hi din a ni, a ti a. Kawngpuia chhiatna tam tak hi vanduai vang liau liauva thleng awm thin mahse fimkhur lohna leh ngaihthah vanga thleng a tam em em a, nasa zawka inzirtirna leh inhrilhhriatna kan neih a pawimawh hle a ni, a ti. District Road Safety Committee in a ngaihtuah theih tur State level lamin a rawn chhawpchhuahte tarlangin chumi mila ruahmanna siam a pawimawh thu a tarlang a ni.

Vawiin a Serchhip District Road Safety Committee hian Serchhip District chhunga khaw hrang hranga lirthei neitute, himna leh fimkhur a tulna lam zirtirna hun neihpuia a khat tawka fehchhuah a rela, khawtina YMA leh Khawtlang huap chanchinbu awm angte hman tangkai dan zawn te, District chhunga chetsualna thlen zinna lai chhinchhiaha a venna awmthei zawn chhuah te, Serchhip khaw chhunga kawng nek zawng leh tihnawk zawnga bungrua leh hmanraw dah hote then faite, dan lova lirthei khalh leh neitute chunga khauh zawka hmalakte, khawchhunga kawng zim hlauhawm zual lai enfiaha a zauh dan ngaihtuah te leh District Action Plan te an ruahmanna. Heng an ruahmanna te hi State Road Safety Council ah thlenin mamawh an neihte pawh an thlen zui nghal dawn a ni. District Road Safety Committee hi Mizoram sawrkar chuan Section 215 (3) of the Motor Vehicles Act, 1988 behchhana a din a ni a,

District Bawrhsap chu Chairman niin District Transport Officer chu member Secretary a ni a, Police, I&PR, Medical, PWD, Excise leh Education Department atangin member turte ruat an ni hlawm a, Autonomous District Council awmnaah chuan Council aiawh Officer ruat tel a ni bawk.

Vawiina Serchhip District Road Safety Committee thutkhawmah hian memberte an kal tha hle a ni.