Swachh Survekshan-2018 hmalak zelna tur bawhzuiin Serchhip District Sanitation Task Force chu DC Conference Hall, Serchhipah vawiin chawhnu dar 2:00 khan District Bawrhsap Pi Sanhchhin Chinzah hovin an thukhawm.

Pi Vanthangpuii, District Urban Development Officer, Serchhip chuan Swachh Survekshan chungchang sawi fiahin, Swachh Survekshan hian khawtlang leh mipui faina lama hma kan sawn zel theihna turin tehfung hrang hrang a nei a. Tun dinhmunah hian India rama khaw 4041 huamin, Mizoram bikah chuan Census Town 23 te a huam tel bawk a ni, a ti.

Vawiin meetingah hian Swachh Survekshan – 2018 lo hmachhawn tura tehfung hrang hrangte zir ho leh sawi ho a ni a, khawtlang, mipui leh sawrkar department hrang hrangte faina lama hma kan lak theihna tur kawng hrang hrang inhrilh hriatna leh hma lak zel dan tur ngaihtuah ani a. District Sanitation Task Force thutlukna angin, Serchhip khawchhunga chhungkaw tinah Sanitation Fee, thla tin cheng 10 theuh khawn nise tih te, zirna in hrang hrang, kohhran hrang hrang, YMA leh Village Council tinah Sanitation Committee din nise tihte leh chhung tinin Inrinni tin chu ‘Tual phiah fai ni’ atan hmangin, mahni kawt leh a chhehvelte phiah fai ziah ni se tihte chu lungrual taka pawm a ni.

He meetingah hian Pu Chuauhnuna, Addl. DC chuan khawpui fai inelna neih zawh tak chu thlir letna hun a hmang a, faina kawnga chak zawka hma lak zel dan tur sawiho a ni bawk a ni.

He hunah hian sawrkar department hrang hrang hotu te, MJA Serchhip aiawhte, Village Council hrang hrang aiawhte leh YMA aiawhte an tel a ni.