Vawiin khan UD&PA Minister Pu Zodintluanga chuan Mizoram Civil Service Officer ten State Institute of Rural Development & Panchayati Raj (SIRDPR) Auditorium, Aizawla foundation training course an neih kharna inkhawm a hmanpui.

Pu Zodintluanga chuan MCS officer-te chu mipui tana awm leh mipui tana thawk an ni tih hre reng tur leh an awm chhan mipui tana rawngbawl tura theih tawp chhuah turin a fuih a. Officer tha chu a hnathawhah a lang thin tiin, an hnathawh that avanga hotute hriat hlawh, hotuten mawhphurhna an pek ngam leh an thur nalh nalh nih tum turin a chah a ni. Minister chuan internet kaltlanga information lakkhawm leh thawnchhuah zung zung theihna digital khawvela chuangkai tawh an nih avangin hriatna a pun rualin an hnathawhah fimkhur a tul lehzual tih hre turin a chah a. Political party tute pawh sawrkar se la, sawrkarna fawng vuantu apiang tana rinawm taka thawk mai tur an ni tih te, sawrkar hmalakna tipuitling tur an ni tih leh sawrkarin ti tura a tih tha taka hlen chhuah mai zel chu officer tha nihna leh ram hmasawnna bul pawimawh zinga mi a nih thu Pu Zodintluanga chuan a sawi bawk.

Programme hi SIRDPR Director Pi Maria CT Zuali’n a kaihruai a. Course Director Pu Khuangthansanga Pakhuangte, Sr. Core Faculty (PA) chuan training an kalpui dan tlangpui a report a. Trainees aiawhin Ngulzathuama leh Margaret J.Vanlalremmawii ten thu an sawi bawk.