Kar kal ta inrinni (18.11.2017) khan Lawngtlai District-a Kawlchaw ‘W’ khuaah Nehru Yuva Kendra (NYK) Lawngtlai huaihawtin Quami Ekta Diwas (National Integration Day) hman a ni.

He hun hi Kawlchaw YLA member Pu Chawisanga’n a kaihruai a. NYK Lawngtlai-a District Youth Coordinator Pi Mercy Sellate chuan hun hman chhan leh NYK chungchang te, NYK-in Kawlchaw W-a hma lak zel an tum dan te a sawi a. Lawngtlai DIPRO Pu C. Lalhruaitluanga chuan khawtlang inpumkhatna pawimawhzia leh tlawmngai pawlte paw’n inthliar hranna awm lova mahni mawhphurhna an hlen zel a tul thu a sawi a. Tv. B. Lalthlamuanpuia (M. Phil)-in “disaster mangement” tih thupui hmanga mihringin keimahni chunga chhiatna kan thlen thin dan leh chhiatna thleng tur laka fimkhur leh inven a tulzia te a sawi bakah, Kawlchaw W VCP Pu T. Rinawma pawhin thu a sawi bawk.

Kum tin November ni 19-25 inkarah National Integration Week hman thin a ni a. Hei hi India rama hmeichhe Prime Minister hmasa ber leh awm chhun Pi Indira Gandhi pianchamphaphak November ni 19 hriat reng nana ruahman niin, hemi ni tak hi National Integration Day tih a ni a. Kumin hian Pathianniah a tlak avangin, NYK Lawngtlai chuan inrinniah an hmang ta a ni.