Vawiin hian Serchhip District Screening Committee on PMAY (HFA) te chu an Chairman Pi Sangchhin Chinzah hovin a Office Chamber ah an thukhawm a, Serchhip District chhunga MLA pahnih             Pi Vanlalawmpuii Chawngthu, Hrangturzo A/C leh Er. Lalrinawma, Tuikum A/C ten telpuiin kum 2017-18 chhunga Pradhan Mantra Awas Yojana-Housing For All hnuaia (Credit Link Subsidy Scheme) insakna diltu hrang hrangte dilna umzui dan tur ruahmanna an siam.

Chairman Pi Sangchhin Chinzah chuan, District Screening Committee ah District chhung MLA pahnihten an telpui avanga a lawmthu leh thlamuan thlak a tih thu a sawi a. Hmalakna kawng hrang hranga an duh leh tha an tihna inthlahrung lova sawia, a tul ang zela sawrkar hnathawkte finchhuah zel turin a ngen a ni. Sawrkar hmalakna te Bank kaltlanga thawh zel an nih tak avangin ram hmasawnna kawngah Bank ten mawhphurhna sang tak an neih thu sawiin, an kutah ram hmasawnna tam tak a innghah a ni, a ti a. Bank aiawh te tha taka an rawn tel avangin lawmthu a sawi bawk.

Er. Lalrinawma, MLA chuan, he scheme in a tum ber chu mirethei, insakna nei zolo te in sak a nih angin a mamawhtu miretheite ring ngam chung a loan pek a ngai a, District chhunga bank hrang hrang ten chu chu hre reng chungin he scheme hi kalpui thei se a duh thu a sawi a. Pi Vanlalawmpuii Chawngthu, MLA pawhin a mamawh tu zawng zawngten he scheme hi an hman tangkai ngei theih nan thawh a tul thu sawiin, loan diltu mipuite pawhin loan a nihna hrereng chunga an dil a pawimawh a tih thu a tarlang a ni.

Vawiina Meeting hian kum hmasa lama Housing For All kaltlanga Credit Link Subsidy kaltlanga insak tanpuina pek, Bank hrang hrangten an umzui dan thlirlet hona neih hmasak a ni a, 2016-17 chhunga kan District target neih 60 zingah mi 21 hnenah he Housing Loan hi pek fel tawh niin tuna kalpui mek engemawzat a awm bawk a. District chhunga a pe tha ber chu MRB Serchhip Branch niin target 7 ah mi 7 a pe a, a dawtah Apex Bank niin target 20 a neihah mi 12 a pe a, SBI Serchhip chuan Target 20 ah mi 2 chauh ala pe hman thung a ni. A pe chhe ber chu MRB Chhiahtlang niin target a neih 6 chu pek a nei hman lova, amaherawh chu hengte hi tun 2017-18 ah pe vek turin an inruahman thung a ni.

Kumin 2017-18 ah hian Serchhip District ah Target 130 pek leh niin heng zinga 100 chu Serchhip Town atan a dah niin Thenzawl ah 20 leh N. Vanlaiphaiah 10 pek a ni a. Serchhip bikah hian diltu mi 88 awmin, nikum lama dil, quota in a daih loh avanga la pek loh engemawzat te nen mi 100 tan hian ruahmanna siam zui niin MRB chhiahtlang chu 6, MRB New Serchhip 13, MRB Serchhip 28, SBI Serchhip 35, Mizoram CO-Operative Apex Bank, Serchhip 20 leh UBI Serchhip 1 te ruahman sak an ni a, MRB N. Vanlaiphai chu 10 leh MRB Thenzawl  leh SBI Thenzawl chu 10 ve ve target pek an ni bawk.

Heng target pekte hi an mahni Branch behchhana diltute chu buaipui tura ruahman niin loan diltute zinga pek tlak loh an awm a nih chuan nikum lama diltu la pek silohte atanga hnawhkhah dan ngaihtuah nise tia ruahmanna siam a ni.

Credit Link Subsidy Scheme hi mirethei an sum lakluh dan atanga teha group hrang hranga then te hnena insakna tur, zauhna turemaw zawm seina tur atana loan lak theihna ruahmanna a ni a, an loan lak interest thenkhat chu Central sawrkar in a chhawk zangkhai sak (subsidy) a ni. A hrechiang duh tan UD&PA Department Directorate leh an District Office hrang hrangah te zawh chian theih a ni.