Vawiin hian Serchhip DC Conference Hall ah Serchhip District chhunga Village Council Members zawng zawngte pualin kum 2022 hmaa  India Ram Thar  (New India By 2022) ruahmanna chungchang sawihona buatsaih a ni a, Pi Vanlalawmpuii Chawngthu, MLA Hrangturzo bila chu khuallian niin Pi Sangchhin Chinzah, DC Serchhip chuan a hmanpui bawk.

Khuallian Pi Vanlalawmpuii chuan, ram tha zawk, nuam zawk leh hausa zawk din turin mitinin mawhphurhna kan nei a ni, a ti a. India thar din tura hmalakna chi rhang hrang, faina te, retheihna laka fihlim te, hlemhletna laka fihlim te, firfiaka chetna, sakhaw inlakbingna leh chi inthliarna lam chi umbo kawngah vawiina kalkhawm Village Council member te chu mahni khua theuhva mite zirtirtu, a taka thawktu tur an ni tih inhre tur leh, retheihna umbo tura sawrkar atanga tanpuina an dawn ang angte a nihna taka hmanga hmasawnpui ngei tum theuh turin a chah a ni.

He hunah hian Pi Sangchhin Chinzah, Serchhip Bawrhsap pawhin thu sawiin India Thar dinna kawnga umbo tur hrang hrang zingah Faina leh retheihna umbo lama hmalakna chu uar zawka hmalakna tur a nih thu sawiin, kalkhawmte chuan Bawrhsap kaihhruaina hnuaiah India Thar Thutiam an tiam ruala, an intiamna lehkhaah an hming ziakin thuneitu sang zawkte hnena thehluh turin lakkhawm zui nghal a ni.

He inkhawmah hian Pu Vanlaltanpuia, MCS, BDO E. Lungdar chuan New India Movement (Sankalp Se Siddhi Abhiyan), he movement hi India mipuiten kum 1942 August thlaa  Quit India Movement an lo neih tawhna champha kum 75 naah neih tan a ni a. Quit India Movement neih a nih atanga a kum ngana ah chian India ramin ramdang awpbehna ata zalenna a lo hmu ta ang khan; New India Movement neih tan atanga a kum ngana (2022) ah India ram chu Bawlhhlawhna, Retheihna, Hlemhletna, Firfiaka chetna, Sakhaw insawrbingna leh Chi inthliarna lakah zalen tumin hma a la ve leh ta a ni, a ti.

He zirhona hi Pu VL Remliana, Project Director, DRDA Serchhip chuan a kaihruaia, thusawituten thu an sawi zawhah kalkhawmten sawihona hun hmang zuiin, hmalak dan tur chi hrang hrang an rel nghal a. Chung zingah chuan, faina lama hmasawn nana in tinin Bawlhhlawh bawm chi hnih, tawih thei leh tawih theilo dahna neih te, khawtinin Bawlhhlawh sawngbawlna hmun neih te, sum leh pai inremchemna lam inzirtirte, chhungkaw sum enkawl dan inzirtirna buatsaih te leh hmalak dan tur dang tam tak an rel a ni.