Vawiin khan Aizawl DC Pu Kannan Gopinathan chuan DC Office Library chei that leh DC Conference Hall thar a hawng. DC Conference Hall thar hawn tak hi a tunlai thei ang bera chei niin hmanraw changkang taka thuam a ni a. A sakna senso atan cheng nuai 20 sawrkar atanga hmuh a ni.

DC Office hi office ding hmasa ber pawl a nih angin Library-ah hian lehkhabu hlui, kum 100 chuanga upa te, lehkhabu rotling leh vang tak tak hmuh tur a awm a. Hun rei tak chhuk mumala enkawl leh hman a nih tak loh avangin nasa taka cheibawl thar a ni a. Lehkhabu zawnawlna (indexing) pawh uluk taka tih that niin mipui a duh apiang tan Aizawl DC official website ‘www.dcaizawl.nic.in’ ah dah chhuah a ni nghe nghe. Library hi a duh apiang tana tlawh theih a ni dawn a, lehkhabu hawhchhuah erawh phal a ni rih dawn lo niin DC chuan a sawi.

Election Branch-ah Voters Facilitation Centre hawn a ni bawk a. Voters ID leh Election thil kaihhnawih zawtfiah duhte tan awlsam takin he Centre atang hian zawhfiah theih a ni ang. Certificate leh Aadhaar Facilitation Centre pawh Pu Kanan Gopinathan hian kum kalta khan a lo hawng tawh a. DC office huam chhunga branch hrang hrangah kal kual a, rei tak tak nghah buai ngai tawh lovin he centre atang hian Tribal Certificate, Aadhaar leh certificate dangte a lakchhuah theih a. A dawrtu mipui  a duh apiang tana hman theih turin free wifi dah a ni bawk. Facilitation Centre ah hian counter hrang hrang siam niin Aadhar thlalakna tur pawh mumal taka siam a ni.