4376/2025-2026

Siaha 10th February 2026: Vawiin khan District Social Welfare Office Siaha-a thawktute chuan Mizoram Upa Pawl, Siaha Sub Headquarters-a Office bearers leh Executive committee member mi 30 chu Charity Home, Serkawr-an tlawhpui a, enkawl mekte tan ei leh in tur bakah thilpek ṭhahnem tak an hlan nghal.

Vawiin hun hman hi National Action Plan for Senior Citizens hnuaiah neih niin, a tum ber chu kum upa leh ṭhalai la naupang zawkte khawvel inkar zau lutuk tihzim a ni. Upate hi Pathianin finna nasa taka a thuam anni a, an hnathawhna aṭanga an chawlh (retired) hnuah pawh ram leh hnam hmasawn (volunteer work) nan tih theih tam tak an la nei a ni tih inhriatthar leh tir a, chutiang ang tak an thawh thiam leh thawh theih tawk kawhhmuh hi a tum ber a ni.

Charity Home, Serkawr hi Evangelical Church of Maraland enkawlna hnuaiah awmin, kum 2002 February 28-a din a ni a; Mizoram sawrkar hnuaiah society registration tih a ni. Tunah hian naupang enkawl lai 17 (mipa 7, hmeichhia 10) awm mekin, thawktu mi 5 ten an enkawl a ni.

Mizoram Upa Pawl member-te hi Charity Home tlawhpui an nih bakah Serkawr-a Lakher Pioneer Missionary hmunhma leh an thlante tlawhpui an ni a, hlawk thlak an ti hle a ni.