4375/2025-2026

Lunglei, 2026 Ramtuk thla ni 10: Vawiin khan Lunglei District pum puiah kum 2026 atana rulhut hlo pek runpui thawh khatna, National Deworming Day (NDD) 2026 February Round kalpui a ni a. Government Middle School-I, Rahsiveng, Lungleia he ni puala a hawnna hun buatsaih chu Lunglei District Additional Deputy Commissioner Pi Rochuangkimi Khenglawt chuan Khuallian niin a hmanpui a, zirlai naupang ṭhenkhat rulhut hlo (Tablet Albendazole) a eitir.

Khuallian Pi Rochuangkimi Khenglawt chuan zirlai thiam thei leh rilru chak ni turin taksa hrisel a pawimawh thu leh hrisel tur chuan thianghlimna ngaih pawimawh a ṭul thu sawiin, zirlaite chu faina leh thianghlimna ngai pawimawh turin a chah a. Rulhut pai lo tur leh taksa hriselna atan kut sil fai ṭhat te, kut tin tihfai ṭhat te, mahni taksa leh chenna in leh a vel vawn fai te, thlai leh thei ei tur sil fai ṭhat leh tui thianghlim chauh in te a pawimawh tih vawng reng tura chahin, nu leh pa leh zirtirtute chu naupangteah faina leh thianghlimna ngaih pawimawhna tuh tum turin a chah.

He hun hi Lunglei Child Development Project Officer (CDPO) Pi R. Lalhmingliani'n kaihruaiin, naupang kum 1 — 19 inkarte rulhut laka ven nan National Deworming Day chu India ram pumah kum tin ṭum hnih hman ṭhin a nih thu a sawi a. Lunglei District Deputy Chief Medical Officer Dr Christina Zonunmawii chuan Powerpoint presentation hmangin mihring tana rulhut ṭhat lohzia leh rulhut hlo ei a pawimawhzia tar langin, rulhut pai lo turin kum khatah rulhut hlo vawi hnih tal ei a ṭhat thu a sawi a. Sawrkarin naupang kum 19 hnuai lam tan kum tin ṭum hnih a thlawna rulhut hlo a pek thu sawiin, naupang kum 2 hnuai lamte chu Albendazole mum chanve pek ṭhin an nih thu leh kum 2 leh 19 inkar chu mum khat pek ṭhin an nih thu a sawi.

Sub-Headquarters MHIP ai awh Pi Vanlalthangi Chhakchhuak chuan kut sil dan a taka entirin, naupangte a zirtir a. Govt Middle School-I, Rahsiveng Headmaster Pu James Vanlalrema pawhin thu sawiin, Deputy District Programme Coordinator (Samagra Shiksha) Pu HS Lalfakzuala'n lawm thu sawiin hun a khar.

NDD 2026 February Round-ah hian Lunglei District chhungah kum 1 — 19 inkar rulhut hlo pek tur tinzawn 44,526 awmin, sawrkar sikul, mimal sikul leh anganwadi centre-ah te rulhut hlo hi pek vek tum a ni a. Vawiin khan District chhunga school, college leh anganwadi centre-ah rulhut hlo hi pek niin, school kai lote chu ASHA-te'n an inah kal chilhin an pe bawk a. Target zinga tel si, vawiina pek hman lohte pe kim tura thual nawn ni (mop up day) atan February ni 17 ruahman a ni.