4374/2025-2026

Saitual, the 10th February, 2026: Vawiin khan District Coordination Committee for NDD in a lo rel tawh angin National Deworming Day 2026 thawhkhatna February thlaa neih tur chu Govt. Selchhunga P/S, Saitualah neih a ni a, Pu Laldingliana, DEO chu khuallian niin NDD 2026 hi hawng nghal a ni.

He hunah hian khuallian Pu Laldingliana, DEO chuan thu a sawi a, National Deworming Day thawhkhatna hawnna hun hman a ni thei chu lawmawm a tih thu sawiin, Health dept lamin a thlawna rulhut damdawi sikul naupang te tana ei tur an buatsaih chu lawmawm a tih thu a sawi bawk. DEO chuan rulhut pai lo tur chuan chaw ei dawnah sahbawn nen fai taka kut sil thin tur a ni, a ti a, thlai rah te pawh fai taka sil a pawimawh a ni, a ti. Khuallian chuan zirlai naupangte chu zirtirtute thu awih turin a fuih a, zuk leh hmuah laka fihlim tur leh lehkha tha taka zir turin a fuih a ni.

National Deworming Day hi naupang kum 1 atanga 19 inkar ten rulhut an pai lohna tura rulhut hlo pek beihpui leh rulhutin a nghawng thalote inzirtirna a ni a, NDD 2026 thawhkhatna hawnna niah hian rulhut damdawi- Albendazole Tablets chu naupangte hnenah sem nghal a ni. School hrang hrangah naupang leh tleirawl kum 1-19, te chu rulhut damdawi pek an ni a, Aganwadi centre zawng zawngah naupang kum 1 atanga kum 5 te hnenah pek an ni bawk a ni. February ni 17 hian damdawi ei hmaih an awm loh nan a thual nawnna (Mop Up Day) hman a ni ang.

Vawiin NDD 2026 February round hawnna inkhawm hi Dr. Zothanpari Chhakchhuak, Dy. CMO chuan kaihruaiin, khuallian Pu Laldingliana, DEO hnen atangin thusawi ngaihthlak a ni a, Dr. Rosiamliani Bawitlung, DPM chuan lawmthu sawinain hun a khar a ni.