No.1795/2020-2021

Mamit 8th June, 2020 : Vawiin khan DC Conference Hall, Mamitah Dr Lalrozama, IAS Chairman, District Vectore Borne Diseases Control Programme ( DVBDCP) / District Bawrhsap kaihruaina-in Mamit District chhunga Malaria umbo tura beihpui thlak mek leh hmalak zel dan tur ngaihtuaha thutkhawm a ni.

Vawiin thutkhawmah hian Jan - Dec 2019 atanga kumin May thla chhunga hmalak tawhna hrang hrangte ngaihthlak niin Mamit District chhung khaw 86-ah damdawi hmanga chiah Long Lasting Insecticidal Nets ( LLIN) thosilen zar 49212 a thlawna semchhuah tawh niin, Indoor Residual Spray ( IRS) 1st Round-ah DDT damdawi hmangin Thosi kah hna kan District chhungah zawh tawh a ni bawk. Mamit District chhunga Malaria tamna hmun thlanchhuah zingah Thaidawr, Mualthuam leh Marpara North-ah te khaw mipuite thisen Test sak vek an ni tawh bawk a. Thosilen leh Thosi hlauh Odomor te Covid - 19 hrileng mek veng tura ramria duty-te tan sem an nih bakah an riahbukte DDT hmanga kah a ni a. Hei bakah hian Quarantine Centre-te DDT hmanga kah sak an ni bawk a ni.

Meeting-ah hian Malaria umbo tura hmalakna-a harsatna awmte sawiho niin Malaria len tam thinna khuaa mi chengte hi tawngdang hmang an nih avangin Health Worker leh ASHA te nen in biakpawhna lamah harsatna a awm thin thu tarlan a ni a. Fur lai anih avangin District chhung khaw thenkhat inkalpawhna kawngpuiah harsatna tawh thin a ni bawk. Mamit District chhunga hnam hrang hrang cheng thenkhatte chu lo neia eizawng an nih avangin ramriak thin an ni a, thosilen zar leh thildangah inthlahdah an awm thin avanga harsatna a awm thin thu tarlan a ni bawk. Heng bakah hian Thawktu indaihlohna leh inbiakpawhna signal tha tawk lo chu harsatna langsar zingah tarlan tel a ni.

Vawiin Meeting-ah hian Anti Malaria Month kumin June thla chhunga hmalakna tur hrang hrangte sawiho niin, Malaria umbo tura mipuite zirtirna chanchinbu hmanga puanzar nise tih a ni a. Mamit District chhung veng/ khawtinah information mike hmangin Covid - 19 hrileng meka invenna kalpui pahin Malaria thlentu thosi titlem tura in leh a vel tifai turte'n vengchhung mipuite zirtirna pek nise, veng chhung theuha thosi pian theihna ti tlem tura hmalakna kalpuina-ah Covid - 19 hrileng mek avanga sawrkar thuchhuahte bawhchhe lova hmalakna nise tih a ni bawk.

Meeting-ah hian Chief Medical Officer, Senior Medical Officer bakah Heads of Offices hrang hrang leh aiawhte, Jt V/C Chairman leh President Sub Hqrs YMA te an tel a ni.