Vawiin khan Aizawl East leh Aizawl West District Task Force on Immunization chu Aizawl DC Dr.A.Muthamma hovin Aizawl DC Conference Hall-ah an thukhawm.

Kum 2019 chhunga Aizawl East leh Aizawl West District huam chhunga zeng hri danna (pulse polio vaccine) pek dan tur te leh natna hri leng vai (surveillance) neih dan tur meeting-ah hian an rel a. March thlaa neih tur Pulse Polio Vaccination atana inbuatsaihna te an sawiho a ni. Kum kalta 2018 khan Mizoram pumah zeng hri danna hi naupang za zela 99 hnenah pek an ni a. Nikum ai maha tha a zeng hri danna hi pek an nih theih nan leh za ah za an tlin theih nan meeting-ah hian rawtna an thlen a ni.

India ram hi zeng hri um bona ramah kum 2014 khan puan a ni tawh a. Chutihrualin ram thenawm Afghanistan leh Pakistan ramah te zeng hri vei an la awm avangin zeng hri danna hi uluk takin India ram chhungah pek zui zel a la ngai a ni. Meeting-ah hian hri danna pek kawnga harsatna an tawh dan te tarlan niin a chinfel dan tur ngaihtuah nghal a ni a. Dr Lalhlimpuii, Surveillance Medical Officer, World Health Organisation (WHO)-in a sawi danin kum kalta khan booth-a hri danna pekah naupang za zela 90 an tel thei a. Ni hnih chhung chu in tinah kalin vaccine la lote hnenah pek an ni bawk. Hei bakah hian sumo stand, bus stand leh taxi stand-ah te kalin thawktuten hri danna la la ve lo naupangte hnenah vaccine an pe bawk a ni.

Hri danna hmanga natna hrik dan theih zawng zawng tih rem a nih theih nan naupang za ah za hri danna pek chu sawrkarin a ngai pawimawh hle a. Aizawl East leh West District chhungah hri danna pek kawnga harsatna an tawh dan te meeting-ah hian sawi ho a ni a. A bik takin Aizawl East huam chhung Manipur ria khaw awm te zingah kal pawh harsa deuh a awm avanga harsatna an tawh dan te leh Aizawl khawpui chhunga awm nghetlo, lut leh chhuak (migrating population) zingah vaccine pek kim a harsat thu ngaihthlak a ni a. Heng hmun te hi chhinchhiah (map out)-a, vaccine pek kim an nih ngei theih nan thlur bing dan ngaihtuah tha an ti a. Social Welfare Department te nen thawk hovin Anganwadi Workers te hman tangkai lehzual dan zawn tha an ti bawk a ni.

Vawiin meeting ah hian Dr Lalhlimpuii, SMO,WHO; Dr Ch Laldinpuia, DIO, Aizawl East District leh Dr PC Lalhmingliana, DIO, Aizawl West District ten power point hmangin presentation an nei a ni.