No.6890/2020-2021

District Task Force on Immunization, Mamit District chu an Chairman Dr. Lalrozama, IAS Mamit District hovin DC, Conference Hall, Mamit-ah vawiin khan thutkhawm a ni.

Vawiin meeting-ah hian Covid- 19 Vaccination chungchanga lo inbuatsaih dan tur bakah IPPI January, 2021 a kalpui dan tur sawiho a ni.

Dr Lalhlimpuii, Serveillance Medical Officer, WHO Mizoram chuan powerpoint presentation hmangin India rama Covid-19 Vaccine dinhmun tlangpui sawifiahna a nei a, Gov't of India hnuaia din National Expert Group on Vaccine Administration for Covid - 19 ( NEGVAC) duhdan angin Covid-19 Vaccine hi atirah frontline workers heng Health Care Services a thawkte, kum upa, kum 65 chunglamte leh natna benvawn neisa pek hmasak tura ruahman a ni a. Vaccine hi vawi leh khatah tamtak a siamchhuah theih loh avangin mipuite kan dam loh pawha min buaipuitute, kum upa leh hriselna lama harsatna nei bikte tan pek hmasak nise tih a ni. India ramin Vaccine kan neih hunah pawh Covid laka kan him theihna invenna tha ber chu tuna invenna kan kalpui mek Mask vuah, kutsil fai leh social distancing te hi thlahthlam lo a, kan kalpui reng a pawimawh thu tarlan a ni a. Mamit District bikah Covid -19 Portal-ah Frontline Workers Covid Vaccine a awm veleha pek hmasak tur hian mi 780 thehluh a ni.

Meeting-ah hian Mamit District chhungah Covid-19 test hrang hrang hmanga en tawh hi mi 4650 an awm tawh thu tarlan a ni a. Heng zing atang hian mi 82 Covid - 19 Positive hmuhchhuah tawh an ni, chu chu test tawh atanga 1.76% a ni. Positive hmuhchhuah tawhte hi mipa 53 leh hmeichhia 29 an ni. 

Vawiin meeting-ah hian Intensified Pulse Polio Immunization January, 2021 a neih tur chungchang sawiho a ni a, Naupang kum 5 hnuailam mi 10444-te hnenah pek tura ruahmanna kalpui a ni, hemi atana vaccine vials mamawh zat chu 693 a nih thu meeting-ah hian tarlan a ni bawk. IPPI 2020 ah hian target atangin 98.3% pek an ni a, Kumtharah pawh a theih ang anga tan la a, target awmsa pe kim ngei tura hmalak nise tih a ni bawk. 

Meeting-ah hian Pu R. Lalmuankima, State Consultant, UNICEF bakah DTFI members-te an tel tha hle a ni.