No.6889/2020-2021

Vawiin khan Social Welfare and Tribal Affairs leh Excise Department changtu Minister Dr K.Beichhua hovin Mizoram Social Defence & Rehabilitation Board (MSD&RB) chu SAD Conference Hall, MINECO ah an thukhawm.

Meeting-ah hian December 2019- December 2020 chhunga MSD&RB hmalakna ngaihthlak a ni a. He Board hi kum 1999 a din niin drugs addict an tlem theih nana hmalatu an ni a, Mizoram bakah Tripura state an bial tel a ni. Ministry of Social Justice & Empowerment hnuaiah project pali - State Level Coordination Agency for Mizoram & Tripura NE-III te, Integrated Rehabilitation Centre for Addicts (IRCA) leh Outreach and Drop in Centre (ODIC) an kalpui a. Ministry of Health & Family Welfare hnuaiah Champhai leh Serchhip District ah te Link Worker Scheme an kalpui bawk a ni.

Kumin chhung khan school leh college zirlai leh zirtirtute zingah awareness programme tum 18 an buatsaih a; YMA hruaitu te, tlawmngai pawl de-addiction centre/rehabilitation centre enkawltute leh College lecturer te tan training tum 28 an nei bawk.

IRCA 11 bakah Department enkawl PISGAH Reformatory, Thingsulthliah-ah leh Reformation Centre, Champhai-ah an nei a. Outreach leh Drop in Centre (ODIC) hi Aizawl leh Champhai District-ah an kalpui a, drugs addict ten an sim theihna tura theihtawpa tan la in damdawi hmanga enkawlna bakah counselling an neihpui thin a ni.

MSD&RB hmalakna in India rama a vawikhatna ni turin Middle School, High School leh Higher Secondary School zirlai kum 10 atanga 17 inkar te leh, an rualpui school kal tawh lo (dropout) te zingah drugs survey an nei a. School dropout 1420 leh school zirlai 10,733 zawhna zawtin zirchianna uluk takin an kalpui a ni.

Drugs Free India campaign (Nasha Mukt Bharat campaign) neih mek a ni bawk a. Hei hi August 15, 2020 atanga tanin March ni 31, 2021 thleng Aizawl, Champhai leh Kolasib District-ah an kalpui ang.  Heng district pathumte hi sawrkar laipuiin rampuma zirchianna - national survey a neih atanga ruihtheih thil ti tamna vulnerable district 272 a thlan chhuah zingah an tel a ni.