Kumin a Diwali, Christmas leh Kum thar lawmna him tlang taka hman a nih theih nan kumdang ang bawka halpuah/ halmawi leh silai lem mu kap chhuak thei (a kap na chi) khap kawnga hmalak zel dan tur vawiin khan Chief Secretary Conference Hall-ah Principal Secretary Home Pu Lalnunmawia Chuaungo hovin sawrkar hotu pawimawh ten an sawiho.

Halpuah leh a kaihhnawih leh silai lem lak luh, zawrh leh hman khapna tupek DC tin ten an district chhungah Diwali leh Krismas leh Kumthar hmain tihchhuah tura hriattirna an tihchhuah bakah Mizoram sawrkar hnuaia Check gate zawng zawng chu heng khap thilte lo lut turte uluk taka veng tura hriattir an ni a. Mizoram chhim lam ramri kan a heng lakluh a nih loh nan BSF leh Assam Rifles-te chu lo veng tura hriattir an ni tawh bawk. Tlawmngai pawl hrang hrang leh Kohhran hruaitute thawhhopui tura ngen ni bawkin, zirna inah te leh khawtlangah he khapna thuchhuak hi tha taka zawm a nih theih nan leh mihring hriselna atan thalo thil a nih avangin inhrilhhriatna pek ni se tia rel a ni a. Mizoram chhunga Bazar leh dawr hrang hrangah heng phal loh thilte hi zawrh a nih leh nih loh YMA leh Police tangkawpin hma an la dawn bawk.