No.3129/2021-2022
Aizawl dated 24th November 2021: Vawiin chawhma khan DC Conference Hall, Kolasibah District Level Task Force on Covid-19-te chuan thutkhawmna hun an hmang a, Task Group on Documentation buatsaih ‘Documentation on Covid-19 Volume-II’ chu Dr.Lalhlimpuia, Chief Medical Officer-in a tlangzarh nghal bawk a ni.

Hun kaihruaitu Dr.H.Lalthlangliana, Deputy Commissioner chuan State dang nena ramri thui tak intawm leh mamawh hrang hrang chawk luhna ber District nichunga hrileng do kawnga hma la tha pawl tak district kan ni chu Sawrkar department hrang hrangte, NGO leh Kolasib mipui thawhhona that vang a nih thu a sawi a. Thla hnih chhung chu Covid-19 test neih zat atanga chhutin za zelah hri kai thar pun dan hi 5 aia a hniam tawh thu a ni.

Dr.Lalhlimpuia, CMO pawhin hrileng dona kawnga thawktute inpeknaah lawmthu sawiin Covid-19 thawh thumna thleng thei a nih angin inthlahdah lova hma lak chhunzawm a pawimawh thu a sawi a, Kolasib district chhunga hrileng dona kawnga hmalakna hrang hrang ziah luhna bu ‘Documentation on Covid-19 Volume-II’ a tlangzarh nghal bawk a ni.

Documentation on Covid-19 Volume-II chungchang sawi zauna hun Pu Hmingthanzuala, DIPRO-in a hmang a, Dr.RK Lalthlamuana, SMO hnen atangin Kolasib district chhunga Vaccine pek dan dinhmun ngaihthlak a ni.

Kolasib district-ah hian April 2021 atanga ni 23, November 2021 thleng khan hri kai 8,153 hmuhchhuah a ni a, September khan hri kai hmuh tam ber niin 2,374 hmuh a ni a, RAT Test 1,80,189, TrueNat 4,455 leh RT-PCR 720 neih tawh a ni. Hri avanga boral mi 30 an awm tawh a, 3C a enkawl 3,523, 4C a enkawl 2,547, DCHC ah 280, ZMC-a thawn 114 leh in lam a inenkawl mi 2,633 an awm tawh bawk a ni. Covid-19 Vaccine 1st dose la mi 51,224 leh 2nd dose la mi 36,605 an awm a ‘Har Ghar Dastak’ program kaltlangin 1st dose 117 leh 2nd dose 50 pek a ni tawh bawk a ni.