No.3128/2021-2022
Aizawl, 24th November, 2021: Sialkal Range Development Council (SRDC) Fund kaltlanga cheng nuai 28 senga sak SRDC Rest House, Selam chu vawiin chawhma dar 10:40 khan Health & Family Welfare Board Vice Chairman Dr. Z.R Thiamsanga, Champhai North bialtu MLA ni bawk chuan a hawng.

Hawnna inkhawmah thusawiin, Dr. Z.R Thiamsanga chuan Selam khuaa khualthlenna tha tak SRDC Rest House hawn a ni ta chu Selam khaw tana ni chhinchhiah tlak tak a nih thu sawiin, Rest House tha tak peihfela hawn a nih theihna kawnga SRDC Chairman leh thawktute inpekna chu fakawm a tih thu a sawi a. Sialkal tlangdung khuate hmasawnna turin sawrkarin theihtawp a chhuah thu sawiin, budget-te tipungin SRDC in a huam khaw hrang hranga chengte inpumkhatna leh hmasawnna rahbi hrang hrang an zawh theih nana hmalak dante tarlangin, eibar zawnna, sports, hriselna, zirna leh tul dangte chawisan leh vawnhim kawngah theihtawp chhuah zel a nih thu a sawi bawk.

Health & Family Welfare Board Vice Chairman chuan Sialkal tlangdung khuate chu lungrualna leh thawhhona tha tak neia hmasawnna kawng chak zawka zawh thei tura rilru seng turin a chah a. Sawrkarin Sialkal tlangdung hmasawnna tura hmasawnna ruhrel leh hmachhawp a neih hrang hrangte a hlawhtlin theihna tura pawimawh ber an nih angin a thlawptu nih tum tura sawmin, mawhphurhna tam tak kan kutah a awm tel a, kan rilru puthmangte siam dik hmasain hmabak kan neihte tha taka hlen turin ngaihtuahna kan sen a ngai a ni, a ti. Hripui leng avangin sum leh paiah harsatna a awm avangin ruahman lawkna anga hmasawnna kawng zawh a har rih thu sawiin, hmasawnna tura ruahmanna felfai tak siam tawh leh hmachhawpte duh anga hlenchhuah theih a ni lo chu pawi a tih thu sawiin, hmasawnna chak zawka kalpui turin kum thar atangin SEDP tan tum a ni, a ti bawk.

Covid-19 Medical Operational Team Chairman ni bawk Dr. Z.R Thiamsanga chuan Covid-19 hrileng chu thil thar a nih angin inzirthar zel a nih thu leh, mitham zawkte rawn chung leh inrawnkhawmna zau zawk neia kal zel dan turte ngaihtuahho thin a nih thu a tarlang a. Case neih zat a zira mitthi tlemna ber State kan ni thei chu kan zavaia thawhhona leh lungrual taka tanhona rah a ni a, ti a. Mipuite nitin khawsak mamawh chhawpchhuah sak kawngah sawrkarin theihtawp a chhuah zel thu a sawi bawk.

Land Development hmangin a bial chhung Hnahlan leh Ngurah te hmalak tum a nih thu leh ramri dep khuaahte border trade mumal taka kalpui tura hmalak mek zel a nih thu pawh a sawi a. A bial chhunga Sub-Centre pahnih tih lohte B.Sc Nursing thutchilh Health & Wellness Centre-ah hlankai an nih vek tawh thu a sawi a. SRDC Rest House hawn tak venhim leh enkawlzui kawngah khawtlang mipuite chu mawhphurhna an neih thu hrilhin, neitu nihna thinlung pu chunga enkawl turin a chah a ni.

Vawiina hawn tak SRDC Rest House, Selam hi mizopa chhiara chhawng thum a ni a. A dung feet 30 leh a vang feet 24 a lian niin, mikhual thlenna tur room 6 (12x10 feet) a awm a, feet 4 a thlawkchhuakin a chhawng chung berah varanda dah a ni a. Toilet 3 leh Chowkidar quarter a awm tel nghal bawk a ni. Kum 2019-2020 khan SRDC Minor Works atanga cheng nuai 20 hmangin a sak bultan a ni a, kum 2021-2022 SRDC Fund kaltlangin cheng nuai 8 sengin tul dangte leha a chhungte siama cheibawl a nih hnuah sak zawh fel a ni.

Hawnna hun hi Selam VCP Pu K.Hauthuama chuan a kaihhruai a. Pu H.Lalrokima, JE, Ngopa RD Block in technical report a pe a.SRDC Member Secretary Pu Vanlaltanpuia, SDO (Civil) Ngopa chuan lawmthu sawiin hun a khar a ni.

Sialkal Range Development Council (SRDC) hi kum 2012 a din niin, 21-Lengteng AC bialtu MLA apiangte hi SRDC Chairman an ni thin a, SRDC Area hian khaw 6; Mimbung, Hrianghmun, Teikhang, Kawlbem, Vaikhawtlang leh Selam te a huam a. Rest House hi Selam bakah Teikhang leh Hrianghmun-ah te sak a ni a, Mimbung leh Aizawl-ah Guest House sak a ni bawk.