No.3127/2021-2022
Aizawl, the 24th November 2021: Vawiin chawhma dar 11:00 khan Zofa Run Lungleng Hnahthial-ah Hnahthial District Planning Committee buatsaihin Capacity Building-Cum District Level Workshop on Sustainable Development Goals (SDGs) neih a ni a, he hun hi Pu R. Lalremsanga, District Bawrhsap chuan a hmanpui a ni.

He hunah hian Hnahthial District chhunga VC te, NGO te leh a kaihhnawih Department official te an tel a ni.

Inkhawm Pi Jennifer Vanlalhruaii Pachuau SDC kaihhruaiah Hnahthial DC Pu R. Lalremsanga chuan Sustainable Development Goals (SDGs) chu United Nations General Assembly-ah hmasawnna rualkhai taka a kal theihna turin ram 196 ten thutlung an ziak a, SDG hnuaiah hian goal 17 a awm a, target 169 a awm bawk a, hei hi UN chauhin a ti hlawhtling thei lova, ram tin ten an hnuaia State, District- te leh khawtlang mipuite hmalaknaa heng goals te hi tih hlawhtlin theih a ni, a ti a.

Tun hma chuan hmasawnna ruhrel reng reng hi a chung lam atangin kalpui tur tih a ni thin a, kan ram ngeiah pawh sorkarin hmasawnna ruhrel a siam khawtlangin kan hman tangkai lem loh hi a tam em em a, hemi tih bo nan hian tunah chuan a hnuai lam (grassroot) atanga kalpui tan tur a ni tih a ni leh ta a, hei hi kalphung dik a ni a, Gram Sabha kaltlangin plan te kan siam ta a, a lawmawm hle a, hei hian khawtlang tana tangkai infrastruture a lo awm ta thin a ni a ti.

Bawrhsap chuan Hnahthial District chu Faina leh thianghlimna kawngah pawh District ti tha ber ni tura tan lak a nih thu te, ziak leh chhiar thiam tamna, hriselna kawngah pawh theih tawp chhuah mek niin Covid-19 vaccine pek chungchangah pawh 100% Vaccination ni tura tan lak mek a nih dan te, Covid-19 do hneh ber district ni tur te, zuk leh hmuam leh ruihhlo chungchangah pawh district felfai ber ni tura tan lak mek a nih dan te a tarlangin Hnahthial District hi Model District kan ni thei a, chutiang chuan district chhunga mipuite kan tanrual erawh a tul dawn a ni a ti bawk.

He hunah hian Pu Lalchhuanawma, Senior Consultant in key note address a sawi a, Pu C. Vanlalzawna, SDG in Mizorama SDG kalpui a nih dan leh NGO hrang hrangte pawimawhna chungchang bakah SDGs indicator chungchangah zirtirna a nei a, zai thiam an zai bakah Pu Vanlalhela, District Research Officer, Economic & Statistics Department Hnahthial in lawmthu sawiin hun a khar a ni.