Nimin khan Disaster Management & Rehabilitation Department chuan a vawi 2-na atan Training for YMA Volunteers on Disaster Response chu 5th IR Bn. Hqrs., Lungverh ah a buatsaih a. Training hawnna hi Pu C.Lalpeksanga, Director, DM&R in a kaihruai a, Pu P. C.Lallawmsanga, IPS, Principal Secretary, DM&R chu khuallian niin, Central YMA atangin Pu J.Lalsailova, Treasurer leh Pu P.C. Lalropuia, Chairman, Disaster Sub- Committee, Central YMA ten an hmanpui a. Hmun hrang hrang atangin training tur hian YMA Member 57 an tel a ni.

Pu P.C.Lallawmsanga chuan training pawimawhna sawiin YMA Volunteers te chu chhiat tawhna a an pawimawh thu leh training thei a YMA Volunteers te an awm chu lawmawm a tih thu a sawi a. Sipai (State Disaster Response Force) atangin training chhuak nei nual tawh mah ila, YMA members te hi chhiat tawhna hmun a thleng hmasa leh tangkai ber an nih thu a sawi lang a. Training pawimawhzia sawiin a practical-a thiamna tak tak nei turin Volunteer te hi a chah a. An training hun chhung a hreawm deuh anih pawhin chhel tak a tuar a theihtawp chhuah tur leh, training zawh a an awmna hmun theuh a zirtirna pe chhawng zel thei turin a fuih a ni.

Pu J.Lalsailova, Treasurer, C.YMA chuan Disaster Management Training hi YMA General Conference in a lo rel tawh a nih thu leh he Training hi Sawrkar in a buatsaih hi lawmawm a tih thu a sawi. Training hi nikhat mai pawh ni lo thla khat dawn lai mahni pawisa seng lo a Sawrkar in a buatsaih chu lawmawm a tih thu a sawi bawk a. Training mek te chu an hriat loh te zawt hreh lo a zawhna an neih te zawt tam turin a chah bawk.

Chairman Pu C.Lalpeksanga, Director, DM&R chuan CYMA leh members te chu a tul ang ang a thawhpui zel turin a sawm bawk a ni.