New Eden Mamit District khua chu nimin dt.10.3.2015 khan kawngpui laihna tur ram chhunga In awmte Pu C. Lalsangluaia, SDO (Sadar) hovin a hmunah en a ni.

NH-44A kawngpui siamna tur hian Land Acquisition Act, 1894 section 4 hmangin dt.12.11.2007 khan, Revenue Department chuan hriattirna a chhuah a, Award No.1 of 2008 hmangin zangnadawmna pek an ni a. Zangnadawmna pek hun lai hian In 35 in zangnadawmna hmuin an zinga chhungkaw 33 te chu In (building) nei an ni a.Dt 14.10 2009 hnu lam atang khan New Eden khuaah hian Bru laklet avang leh mahni duhthua in sate avangin In (building) a pung chho ve zel a. Tunah hian kawngpui atana lak tawh chhungah chhungkaw 96 lai an awm mek a. Heng mite hi Land Acquisition dan kalha awm an nih avangin kawng siamna tur pawn lama insawn tura hriattir an ni tawh thin a. Chhungkaw 16 chauhin an in an thiah avangin tun thlenga la insawn lo te insawn dan tur enho a ni a, New Eden VC ten insawnna hmun tura an ruahman Chhimluang lui bul tlang bawk chu enho a ni a, helai hmun hi Chhimluang Riverine Forest Reserve Area chhung a nih avangin khaw bul hnaiah hmun dang pawh enho nghal a ni a, a rang thei ang bera insawn turin hriattir nghal an ni.

New Eden khua Highway kawng enna ah hian Pu C. Lalsangluaia bakah Pu Vanlalhmachhuana ASO, Pu H. Lalthanpuia, SDO, PWD, National Highway Sub-Division II , Pu V. Lalchhawntluanga SDO (Civil), DIPRO bakah staff dang te an tel a ni.