Vawiin chawhma ah khan Department of Political Science Conference Hall-ah Higher & Technical Education Minister Pu R. Romawia chuan ni 2 awh tur ' National Seminar on Autonomy Movements and Politics of Regionalism in North East India' hawnna programme buatsaih a hmanpui.

Seminar hawnna ah hian Prof. R.Lalthantluanga, Vice Chancellor, Mizoram University(MZU) pawh tel in Department of Political Science a thawk mek Prof. J.K. Patnaik, Prof. Srinibas Pathi, Dr.J.Doungel, Dr. K.V. Reddy leh Rev.Dr.Lalchungnunga, Chairman, MBSE ten an lehkha ziak behchhan in thusawina hun an hmang a ni.

Department of Political Science, MZU buatsaih seminar hawnna a thusawitu H&TE Minister Pu R. Romawia hian zirlaite hnenah North East India leh a bikin Mizoram chhunga District, Autonomous District leh tualto politics a lo pian chhoh dan te a sawi a. North East miten inlak hran duhna thinlung leh state pakhat chhunga hnam tlem zawk ten inhung hran an duh leh chhawn zel nachhan ni a a hriat te a tarlang bawk. Minister hian India ram ropui tak ah hnam peng hrang hrang leh sakhaw hrang hrang betute hi inlak hran duhna thinlung kan lo neihna te thawi dam a nih theih nan mithiam rualte chuan an seminar chhung in autonomy movements leh regional politics a lo so san thin nachhan hrang hrang awm thei te hi zir chhuak se a damdawi pawh chawh thei se a duh thu a sawi a ni.

' National Seminar on Autonomy Movements and Politics of Regionalism in North East India' buatsaih tak hun chhunga zirtirna pe turin mithiam tak tak te state pawn atanga rawn tel in Mizoram in Political Science subject ami rawn tlak a neih te pawhin zirtirna an pe dawn a ni. Seminar chhung hian mithiam rual buatsaih seminar paper 40 chuang zirho tum a ni.