Vawiin khan Health & Family Welfare Minister Pu Lal Thanzara chuan Mizoram Government Pharmacist’ Association General Conference vawi 9-na I&PR Conference Hall-ah a hmanpui.

Pu Lal Thanzara chuan State changkang ni turin a chhunga cheng mipuite hriselna a that a ngai a, mipui hriselna a that theih nan Health Department hnuaia hna peng hrang hrang thawktute an pawimawh hle a ni, a ti a. Mipui hriselna tura mawhphurhna sang tak nei leh mipui nena inhne reng a thawk an nih avangin Health Department-a thawktute chu fimkhur leh taima taka an thawh a tul a, mi pakhat tawngkam mawi loh avangin department pumpui hmai a bal thei tih hriain thawktu zawng zawngte fimkhur leh zaidawh taka mipui lo dawng sawng thin turin Health Minister chuan a fuih a ni.

Minister chuan Pharmacist-te thiamna leh pawimawhna hriain sorkar chuan tun aia tangkai lehzual zawka an thawhna turin hma a la mek a, chung zinga pawimawh em em Generic Drug Store hawn chungchangah pawh pharmacist-te chu a kut ke berah an tan a tul dawn a ni, a ti a. Mipuite’n company siam damdawi manto tak taka an lei thin chu Generic Drug Store atang hian man tlawm te in an lei thei dawn a, he dawr hi Civil Hospital compound-a hawn tum niin tunah hian Doctor-te’n an generic damdawi mamawh tur te an thlang mek a, a bul tan nan cheng nuai 12 vel hu damdawi chah chhuah tum a ni, a ti.Pu Lal Thanzara chuan a thlawna damdawi dawn theihna tur Chief Minister’s free drug scheme pawh hman thuai tum a ni tiin heta tana hman tur sum cheng vaibelchhe 1 pawh sorkar-in a nei tawh tih a sawi a. He scheme hmang thei tur hian Mizoram puma Health Sub-Centre te internet hmanga thlun zawm a tul avangin NHM hotute remtihna in hma lak thuai tum a ni, a ti bawk.

Ni hnih chhung awh tur MGPA General Conference hawnna inkhawm hi an Vice President Pu Lalvuana’n a kaihruai a. Chawhnu lam ah official agenda 4 sawi hovin naktuk hian Scrub Typhus, TB Drugs Doses leh Clinical Pharmacy chungchang zirhona an nei ang.