Vawiin khan Environment & Forests Minister Pu Lalrinmawia Ralte chuan Department of Psychology, Mizoram University leh Alumni Association of Psychology, MZU tangkawp ten ngawlvei leh ngawlveite enkawl dan chungchanga zirhona ‘One Day International Workshop on Addiction and Rehabilitation’ tih, Dean’s Conference Hall, School of Social Sciences, MZU a an buatsaih chu a hawng.

Pu Lalrinmawia Ralte chuan zu leh ruihtheih thil avanga ngawlveite buaipui kawngah hian khawvel ramtin leh hnam tinte an bang bik lova tiin mihring tichhe thei damdawi hmansualna hi mitinin kan ngaituah leh kan vei a hun tawh tak zet a ni, a ti a. Ngawlvei (addition) titawp emaw, do tur emaw hian mihring tumruhna chauhin thil a ti thei lova, hemi kawnga mithiamte puihna leh thurawnte a pawimawh hle nia a hriat thu a sawi.

Minister chuan Mizorama mimal, tlawmngai pawl leh Kohhran ten zu leh damdawi ngawlveite an vei leh an ngaihtuah thin hi a lawmawmin a ropui a tih thusawiin ngawlveina laka talchhuahna leh chhanchhuahna kawng dik ber leh tha ber niawma rin leh hriat chu thil awlai lo tak a nih ka ring, a ti a. He zirhona atanga mithiam kalkawmte tawnhriat leh thiamna atangin ngawlvei te enkawlna leh tanpuina kawng tha, sawt leh huapzau zawk a in herchhuah ngei a beisei thu a sawi bawk.

Workshop ah hian MZU, Vice Chancellor Prof. R. Lalthantluanga’n inlawmna thu a sawi a. Prof. HK Laldinpuii Fente, Department of Psychology in Workshop hi kaihruaiin Key Note Address chu Pi Remmawii Kristjanson, Red Lotus Recovery Center, Atlantla, Georgia, USA chuan a sawi a ni.

Workshop ah hian Psychology Department zirtirtu leh zirlai te, Psychology subject zirchhuak tawh te, Clinical Psychologist thawk mek te, Health & Family Welfare Department a thawk te, Police, Excise & Narcotics  leh Social Welfare Department aiawhte leh rilru lam doctor Psychiatrist engemaw zat an tel a ni.