Vawiin chawhnu khan Disaster Management & Rehabilitation Minister Nihar Kanti Chakma chuan Aizawla ruahsur vanga chhiatna thleng tharte a hmuna tlawhin a enfiah a. Chhiatna tawkte leh khawtlang hruaitute kawmin hmalak dan tur leh tanpuina pek theih dan turte a sawipui bawk a ni.

DM&R Minister hian Kanan Veng (Middle Kanan)-a leimin a tlawh hmasa ber a. Khawtlang hruaitute leh chhiatna tawkte kawmin hnatlang thingpui inna tur a tum sak bakah silpaulin bundle 2 a pe bawk. Kanan Venga leimin hian Kanan YMA Vice President Pu Laldawngliana Tochhawng leh Pi Thanveli te kawtah kawng a dang ping a, a thlanga Pi Thanveli inluah chhungkaw 2 leh a chhaka Pi Kawlhnuni in luah chhungkaw 5 chu an inthiar chhuak nghal a ni. Leimin hi khawtlangin hnatlangin an thian a, a thenfaina atan hian bialtu MLA Brig. T. Sailo chuan JCB hmanna a tum bawk a ni. DM&R Minister chuan PWD hotute nena sawi hoa a rang thei ang bera hma lak a tum thu leh khawtlang hruaitute thawhpuina a mamawh thu a sawi a ni.

Hemi hnu hian Chaltlang North-ah kal lehin Chaltlang North YMA hruaitute a kawm a, kawng kawi kham hlauhawm leh accident tamna laite en hoin a venna atana railing/fencing dah dan tur an sawi ho. Chaltlang North a tlawhnaah hian Mizoram Legislative Assembly Speaker Pu R. Romawia, bialtu MLA ni bawk chuan a tawiawm a ni.

DM&R Minister Pu NK Chakma hian vawiin chhun dar 12:10pm a Tuikual B Mual-a leiminna hmun a tlawh nghal bawk a. Leimin hian Nl. Laltanpuii (33) d/o HB Lalramtiama chu a chhilh a, khawtlang tangrualin zawng nghal mah se leimin hian a lo chhilh hlum hman a ni. Leimin hian Pu Lalhmangaiha in bang chhak lam delh chhiain inchhungah tui leh lei a lut hnem hle bawk. Leiminna hmun hi UD&PA Minister Pu Zodintluanga pawhin a tlawh nghal a, hnatlangte tanpuina pein hmalak dan tur an en pui a ni.